वडा अध्यक्ष मगरको पहलमा ४ वटा विद्यालयका शिक्षक तथा विद्यार्थीलाई स्वेटर सहित विवधि सामाग्री वितरण

माघ ७, सोलुखुम्बु । सोलुखुम्बुको माप्य दुधकोशी गाउँपालिका वडा नम्बर ६ का वडा अध्यक्ष राम प्रसाद मगरको पहलमा वडा भित्रका चार विद्यालयका शिक्षक विद्यार्थीहरुलाई स्वेटर सहित विविध सामाग्री वितरण गरिएको छ । नेपाल विदाउट लिमिट्स, जोआना स्टाइनेलको सहयोग र वडा अध्यक्ष मगरको पहलमा विभिन्न शिक्षक तथा विद्यार्थीलाई आवश्यक समाग्री वितरण गरिएको हो । चोच्मि आवि, पशुपति आवि,जलेश्वरी आवि र सगरमाथा आविका विद्यार्थी र शिक्षकलाई झोला स्वेटर, टोपी, ब्रस, मन्जन लगायतका सामाग्री वितरण गरिएको सहकर्मी देवि प्रसाद घिमिरेले जानकारी दिनुभयो ।

जलेश्वरी आविका १२८ जना विद्यार्थी, ११ जना शिक्षक र सगरमाथा आविका ३५ जना विद्यार्थी, ४ जना शिक्षकलाई स्वेटर र टोपि वितरण गरिएको छ । यस्तै चोच्मि आविका ५३ जना शिक्षक तथा विद्यार्थीलाई स्वेटर, टोपी र पशुपति आविका १५ जना विद्यार्थी र ३ जना शिक्षकलाई झोला, स्वेटर, टोपी, ब्रस, मन्जन लगायतका सामाग्री वितरण गरिएको वडा अध्यक्ष राम प्रसाद मगरले बताउनुभयो । बढ्दो जाडोका कारण विद्यार्थीलाई पर्न सक्ने स्वास्थ्य समस्या कम गर्ने उदेश्यले संघसस्थाहरुको सहकार्यमा सहयोग गरिएको उहाँको भनाई छ । आगामी दिनहरुमा यस कार्यलाई निरन्तरता दिदै जाने वडा अध्यक्ष मगरले प्रतिबद्धता व्यक्त गर्नुभएको छ ।