चिशंखुगढी गाउँपालिका स्तरीय राष्ट्रपति रनिङ शिल्डको उपाधि माम्खा माविलाई, जित्यो सर्वाधिक २३ पदक

ओखलढुङ्गा, ९ माघ ।  ओखलढुङ्गाको चिशंखुगढी गाउँपालिकामा आयोजित तेश्रो राष्ट्रपति रनिङ शिल्ड प्रतियोगिताको शिल्ड माम्खा माविले हात पारेको छ ।  गत ७ गतेदेखी सुरु भएको रनिङ शिल्डका विभिन्न खेलहरुका उत्कृष्ठ प्रदर्शन गर्दै माम्खा माविका खेलाडीहरूले शिल्ड आफ्नो पोल्टामा पार्न सफल भएका हुन्  । यस यघि अघिल्लो वर्ष पनि माम्खा माविले शिल्ड जितेको थियो । एथ्लेटिक्स सहित विभिन्न १७ प्रकारका खेलहरूमा विद्यालयले १३ स्वर्ण ७ रजत र ३ कास्य पदक गरि २३ पदक सर्वाधिक जित्दै शिल्ड आफ्नो हात पार्न सफल भएको हो ।  ७ विद्यालय सहभागी रनिङ शिल्डका प्रतियोगितामा कुइभीर मावि कुइभीर दोश्रो भएको छ ।

  उक्त विद्यालयले प्रतियोगितामा ७ स्वर्ण ७ रजत र ८ काश्य सहित २२ पदक जित्दै दोश्रो भएको हो ।  प्रतियोगितामा तेश्रो स्थान जालपा मावि कालीमाटी ७ स्वर्ण, २ रजत र ४ काश्य सहित १३ पदक जित्दै तेश्रो हुन सफल भएको हो ।  शिल्डको अन्तिम दिन आज समामपन गर्दै चिशंखुगढी  गाउँपालिकाका अध्यक्ष निशान्त शर्माले विद्यार्थीहरूको खेल प्रतिको रुची देखेर आफूलाई खुसि लागेको बताउनुभयो ।  उहाँले ३ दिन सम्म सञ्चालन भएको रनिङ शिल्ड प्रतियोगिताका क्रममा उहाँले विद्यार्थीहरूले देखाएको खेल कौशलहरू हेर्दा प्रतियोगिता मात्रै नभई एक पर्वको रुपमा रहेको महसुस गरेको जिकिर गर्नुभयो ।  

उहाँले गाउँपालिकाले खेलकुद क्षेत्रको विकासका लागी विद्यार्थीहरुको यो उत्साहले नयाँ सिडि थपिने भन्दै सबैलाई धन्यवाद दिनुभयो ।  रनिङ शिल्डमा गाउँपालिकाका ७ माविहरु कुइभीर मावि कुइभीर, सरस्वती मावि खानीभञ्ज्याङ,  जालपा मावि दियाले, जालपा मावि कालिमाटी, महेश्वर मावि भदौरे, छात्रप्रगती मावि भदौरे र माम्खा मावि माम्खाले प्रतिपस्पर्धा गरेका थिए  । रनिङ शिल्डको उद्घाटनका लागी प्रतिनिधि सभाका सांसद तथा काङ्ग्रेस नेता रामहरी खतिवडाले सम्बोधन गर्नुभएको थियो भने समापन समारोह गाउँपालिका अध्यक्ष निशान्त शर्माको प्रमुख आतिथ्यतामा सम्पन्न भएको छ । समापन कार्यक्रममा गाउँपालिका उपाध्यक्ष सन्तोषबाबु थापा, वडा अध्यक्षहरु, ७ वटै माविका प्रधानाध्यापक, विद्यार्थी, शिक्षक कर्मचारी तथा खेलप्रेमी स्थानीहरुको उपस्थीति रहेको थियो ।