थुलुङका ५ वडामा “अपाङ्गता परिचयपत्र वितरण तथा आवश्यकता पहिचान शिविर” सम्पन्न 

जेठ ६ सोलुखुम्बु ।  सोलुखुम्बुको थुलुङ दुधकोशी गाउँपालिका का ५ वटा वडामा अपाङ्गता परिचयपत्र वितरण तथा आवश्यकता पहिचान शिविर सम्पन्न भएको छ ।  आज गाउँपालिकाको वडा नम्बर ७ देउसामा सम्पन्न भएपछि गाउँपालिकाका ५ वटा वडामा शिविर सम्पन्न भएको प्रवक्ता भोजराज कार्कीले बताउनुभयो ।

आज देउसामा सम्पन्न शिविरमा १५ पुरुष र २१ महिला गरि ३६ जनाले स्वास्थ्य परिक्षण गराएको प्रवक्ता कार्कीले बताउनुभयो । उहाँका अनुसार आजको शिविरमा देउसाका अपाङ्गता भएका ३ जनालाई नयाँ अपाङ्गता परिचयपत्र वितरण गरिएको छ । जसमा १ जनालाई “क” वर्गको, १ जनालाई “ख” बर्गको र १ जनालाई “ग” वर्गको परिचयपत्र वितरण गरिएको उहाँको भनाई छ । यसअघि वडा नम्बर ८ मा ४५ जनाको स्वास्थ्य परिक्षण गरि ५ जनालाई नयाँ अपाङ्गता परिचयपत्र वितरण गरिएको थियो भने वडा नम्बर ४ र ५ जुबुबाट १ सय १० जनाको स्वास्थ्य परिक्षण गरि ८ जनालाई नयाँ कार्ड वितरण गरिएको थियो ।

वडा नम्बर ९ लोखीममा ५८ जनाको स्वास्थ्य परिक्षण गरि ८ जनाको अपाङ्गता परिचयपत्र वितरण गरिएको र  २ जनालाई नयाँ परिचयपत्र वितरण गरिसकिएको गाउँपालिका अध्यक्ष असिम राईले बताउनुभयो । थुलुङ दुधकोशी गाउँपालिका, कोशी प्रदेश सामाजिक विकास मन्त्रालय र करुणा फाउण्डेसन नेपालको सहकार्यमा अपाङ्ग महासंघ नेपालको प्राविधक सहयोग रहेकाे अपाङ्गता रोकथाम तथा पुनर्स्थापना शिविर पालिकाका अन्य वडाहरूमा पनि क्रमश सञ्चालन हुने छ । जिल्लाका अन्य बिभिन्न पालिकाहरूमा समेत यो कार्यक्रम सञ्चलन भइरहेको छ ।