छाउगोठमा सुतेकी महिलामाथि बाघको आक्रमण

माघ १४, सोेलुखुम्बु । कैलालीको मोहन्याल गाउँपालिका–७ कुइनेमा बाघको आक्रमणबाट एक महिला घाइते भएकी छन्। छाउगोठमा सुतिरहेको अवस्थामा ४० वर्षीया सरस्वती विकलाई बाघले आक्रमण गरेको थियो । आइतबार राति करिब साढे १० बजेको समयमा बाघले आक्रमण गरेको मोहन्याल गाउँपालिकाका अध्यक्ष देवीदत्त उपाध्यायले जानकारी दिए ।

उनका अनुसार बाघको आक्रमणले उनको टाउको र मुखमा चोटमा लागेको छ । गाउँलेले होहल्ला गरेपछि बाघ भागेको उनको भनाई छ । इलाका प्रहरी कार्यालय चिसापानीका प्रमुख प्रहरी निरीक्षक ज्ञानेन्द्रसिंहले पनि बाघले पन्जा हानेको र होहल्ला भएपछि बाघ भागेको बताएका छन् । घटनास्थलमा प्रहरी पुगिरहेको छ । विकलाई उपचारको लागि लम्की ल्याउन ल्याइएको छ । उनको अवस्था भने खतरामुक्त छ ।