काङ्ग्रेस नेता कार्कीले दिए ५९ विद्यार्थीलाई ट्रयाकसुट, विद्यार्थीको अनुहारमा चमकता 

माघ १४, सोलुखुम्बु ।  काङ्ग्रेस नेता प्रकाशसिंह कार्कीले एक आधारभूत विद्यालयका साना साना विद्यार्थीलाई ट्रयाक सुट वितरण गर्नुभएको छ ।  सोमबार एक कार्यक्रमका बीच नेचासल्यान गाउँपालिका वडा नम्बर ४ को सगरमाथा आधारभूत विद्यालयका ५९ जना विद्यार्थीलाई ट्रयाक सुट वितरण गरिएको हो ।  नेता कार्की को प्रमुख आतिथ्यता तथा वडा नम्बर ४ का अध्यक्ष इन्द्र बहादुर राईको विशेष आतिथ्यतामा सम्पन्न कार्यक्रममा कक्षा १ देखी ८ सम्मका ५९ जना विद्यार्थीलाई ट्रयाक सुट वितरण गरिएको थियो ।

 कार्यक्रममा बोल्दै सुकीर्ति फाउण्डेसनका संरक्षक तथा काङ्ग्रेस नेता कार्कीले आफूले शिक्षा र स्वास्थ्यको क्षेत्रमा आफ्नो मेहनतको कमाईको केही हिस्साले मात्रै सहयोग गर्दै आइरहेको र यसले आफूलाई खुसी दिने बताउनुभएको थियो । उहाँले विद्यार्थीहरूको जीवनमा थोरै भएपनि सहयोग पुगोस् भन्ने हेतुले आफूले यसरी सहयोग गरिरहेको भन्दै निरन्तर सहयोग गदै जाने उल्लेख गर्नुभयो । उहाँले फाउण्डेसन मार्फत बचत गरेको ५० लाख रकमको व्याजले सगरमाथा आधारभूत विद्यालयमा एक शिक्षकका लागी तलव र अन्य विभिन्न सेवाका लागी सहयोग गर्दै आइरहेकोमा वडा अध्यक्ष इन्द्र बहादुर राईले बताउनुभयो ।  अध्यक्ष राईले नेता कार्कीको सहयोगले विद्यालयलाई राहत भइरहेकोमा वडाबाट केही बजेट छुट्टाएर त्यसमा थप गरिदै आउको पनि बताउनुभयो ।

 कार्यक्रममा नेपाली काङ्ग्रेसका नेता, नेपाल विद्यार्थी सङ्घका केन्द्रिय सदस्य दिनराज बास्तोलाले नेता कार्कीले सहयोग गर्दै आइरहेकोमा खुसी व्यक्त गर्नुभयो । उहाँले विभिन्न विद्यालय तथा स्वास्थ्य संस्थाहरूमा आवश्यक सहयोग गरिरहेकोमा त्यसले आम नागरिकको जीवनमा प्रत्यक्ष लाभ मिलिरहेको जिकिर गर्नुभयो ।  सोमबार ट्रयाक सुट वितरण कार्यक्रममा सुकीर्ति फाउण्डेसनकी अध्यक्ष इन्दिरा कार्की, विद्यालयका विव्यस तथा पूर्व विब्यस अध्यक्ष तथा पदाधिकारी, शिक्षक विद्यार्थी, रीड नेपालकी फिल्ड अफिसर सुजता राई  लगायत स्थानीय राजनितिक दलका नता कार्यकर्ताहरूको उपस्थिति रहेको थियो ।