सोलुखुम्बुमा एच.पी.भी.विरुद्ध खोप अभियान सम्वन्धी अभिमुखीकरण कार्यक्रम सम्पन्न

माघ १५, सोलुखुम्बु । जिल्ला स्वास्थ्य कार्यालय सोलुखुम्बुले आयोजना गरेको राष्ट्रिय एच.पी.भि खोप अभियान सम्बन्धी अभिमुखीकरण कार्यक्रम सम्पन्न गरेको छ । मंगलबार सल्लेरीको एक होटलमा जिल्ला खोप समन्वय समिति तथा पत्रकार अभिमुखीकरण गोष्ठी कार्यक्रम सम्पन्न गरेको हो । राष्ट्रिय खोप अभियान अन्र्तगत जिल्लामा पनि पाठेघरको मुखको क्यान्सर गराउने ह्युमन प्यापिलोमा भाइरस एच.पी.भी. विरुद्धको खोप अभियान यही माघको २२ गते देखी २५ गते सम्म सञ्चालन गर्ने भएको छ ।

अभिमुखीकरण कार्यक्रममा जिल्ला स्वास्थ्य कार्यालय प्रमुख सुमन तिवारीले एच.पी.भि खोपको बारेमा स्पष्ट पार्नुभएको छ । एच.पी.भी. विरुद्धको खोपले कुनै असर नपार्ने भएकाले ढुक्क भएर खोप लगाउन सम्पूर्ण बालबालिकाहरुलाई आग्रह गर्नुभएको छ । यस्तै जिल्ला अस्पताल फाप्लुका निमित्त प्रमुख डाक्टर श्रेया पङ्गेनीले एच.पि.भि.ले महिलाहरुको पाठेघरको मुखको क्यान्सरको साथै आउने मुसा तथा यौनाङ्गको क्यान्सर समेत गराउन सक्ने हुनाले खोप अभियानमा १० वर्ष देखी १४ वर्षसम्मका किशोरीहरुलाई सहभागी गराई खोप लिन र खोप सुरक्षित भएकोले कुनै भ्रममा नपरी खोपको विषयमा प्रचार, प्रसार गरी किशोरीहरु सहभागी गराउन सरोकारवालाहरुलाई आग्रह गर्नुभयो ।

पाठेघरको क्यान्सर सानै उमेरमा बच्चा जन्माउदा, सुत्केरी अवस्थामा पोषीलो खानाको कमी र स्वस्थ्य सरसफाईको कमीले इन्फेक्सन भएर लाग्न सक्ने स्वस्थ्य कार्यालयले जनाएको छ । नेपाल सरकारले विश्व स्वास्थ्य सङ्गठन डब्लुएचओबाट प्रमाणित उक्त खोप किशोरीलाई एचपिभीको सङ्क्रमणबाट सुरक्षित हुन अभियान सञ्चालन गर्न लागेको हो । जिल्लामा ५ हजार ७ सय छात्राहरुलाई क्यान्सर विरुद्धको खोप लगाइने स्वास्थ्य कार्यालयले जनाएको छ ।

उक्त कार्यक्रममा जिल्ला समन्वय समितिका उप्रमुख टिका माया मगर, सहायक प्रमुख जिल्ला अधिकारी नरेन्द्र कुमार श्रेष्ठ, शिक्षा विकास तथा समन्वय इकाइ प्रमुख पुण्यराज डंगोल, जिल्ला आयुर्वेद स्वास्थ्य केन्द्र सोलुका सूचना अधिकारी केशव ढुंगाना, उद्योग वाािणज्य संघका अध्यक्ष रामलाल श्रेष्ठ, जिल्ला प्रहरी कार्यालय सोलुखुम्बुका प्रहरी नायव उपरीक्षक द्धारिका प्रसाद घिमिरे लगायतका सुरक्षाकर्मी, स्वास्थ्यकर्मी र सञ्चारकर्मीहरुको उपस्थित रहेको थियो ।