अध्यक्ष बस्नेतले गरे खोप खर्कमा स्वास्थ्य चौकी भवनको उद्घाटन

माघ १७, सोलुखुम्बु । सोताङ गाउँपालिकाका अध्यक्ष खिलराज बस्नेतले आधारभूत स्वास्थ्य चौकी भवनको उद्घाटन गर्नुभएको छ । मंगलबार एक कार्यक्रमका बिच अध्यक्ष बस्नेतले वडा नम्बर २ खोप खर्कमा नवनिर्मित आधारभूत स्वास्थ्य भवनको उदघाटन गर्नुभएको हो । उद्घाटन कार्यक्रमलाई सम्बोधन गर्दै गाउँपालिका अध्यक्ष बस्नेतले शिक्षा र स्वास्थ्यको विकासले नै समुन्नति ल्याउने बताउनुभयो ।

यो भवन निर्माण सम्पन्न भई अब यसैबाट स्वास्थ्य सेवा पाउनु यहाँका नागरिकका लागि सुखद कुरा भएको उल्लेख गर्दै स्वास्थ्य चौकीबाट प्रवाह गर्ने सेवा सुविधा गुणस्तरीय हुनुपर्ने बताउनुभयो । त्यस्तै, सोताङ गाउँपालिका वडा नम्बर २ का वडा अध्यक्ष श्याम कुमार खालिङले स्वास्थ्य क्षेत्रलाई प्राथमिकता दिएको भन्दै उहाँले नागरिकको स्वास्थ्यप्रति स्थानीय सरकार गम्भीर र जिम्मेवार रहेको उल्लेख गर्नुभयो ।

वडा कार्यालयले चेपेल फाउन्डेसनसँग समन्वय गरी १ करोड ४० हजार ९ सय ५७ रुपैयाँमा निर्माण सम्पन्न भएको सहकर्मी मनोज तामाङले जानकारी दिनुभयो । उक्त स्वास्थ्य चौकी ९ कोठे भवन, शौचालय, हिल ट्याङ्की, बरन्डा, तार जाली र घेरा बार सहितको कम्पाउन्डमा फलामे गेट भएको आर सिसी पक्की भवनको निर्माण कार्य २०८१ पुस १० गते सम्पन्न भएको जनाइएको छ ।