खोटाङमा खाल्डोमा पुरेको अवस्थामा नवजात शिशु भेटियो

माघ १८, सोलुखुम्बु । खोटाङमा नवजात शिशु मृत खाल्डोमा गाढेको अवस्थामा फेला परेको छ । दिक्तेल रुपाकोट मझुवागढी नगरपालिका वडा नम्बर–१२ जालपामा नवजात शिशु मृत अवस्थामा फेला परेको हो । स्थानीय जसबहादुर राईको घरबाट अन्दाजी ८ सय मिटर पर रहेको बाँसभञ्ज्याङ नजिकै खाल्डो खनेर गाडेको अवस्थामा शुक्रबार शिशु भेटिएको जिल्ला प्रहरी कार्यालयका प्रहरी नायव उपरीक्षक प्रतीक विष्टले जानकारी दिए ।

शिशु मृत भेटिएको भन्ने जानकारी आएपछि प्रहरी चौकी जालपाको टोली घटनास्थल पुगेको र शिशु मृत अवस्थामा रहेको शिशुको एउटा हातबाहेक सबै कुकुरले खाएको भेटिएको विष्टको भनाई छ । भेटिएको एउटा हात पोस्टमार्टमका लागि जिल्ला अस्पताल ल्याइएको र घटनाको अनुसन्धान सुरु गरिएको प्रहरीले जानकारी दिएको छ ।