गएराति माप्य दुधकोशीमा आगलागी, एक घर जलेर नष्ट

माघ १८, सोलुखुम्बु । सोलुखुम्बुको माप्य दुधकोशी गाउँपालिका वडा नम्बर ४ देवकुमा आगलागी हुँदा एक घर जलेर नष्ट भएको छ । गएराति करिब १० बजेको समयमा नव बहादुर राईको तीनतले ढुङ्गा, माटो, काठ र टिनको छानो भएको घर जलेर नष्ट भएको हो ।

आगलागी भएको जानकारी प्राप्त हुन साथ प्रहरी चौकी काकुबाट प्रहरी सहायक निरीक्षक राजुपुन मगरको नेतृत्वमा प्रहरी टोली तत्काल घटनास्थलमा पुगेर स्थानीय बासिन्दाको सहयोगमा आगो नियन्त्रणमा लिएको थियो ।

आगलागीबाट अन्नपात, भाँडाकुँडा, लत्ताकपडा, किराना पसलका सामान तथा ५ तोला सुनसहित सम्पूर्ण सामग्री जलेर नष्ट भएको जिल्ला प्रहरी कार्यालय सोलुखुम्बुका प्रहरी नायव उपरीक्षक द्धारिका प्रसाद घिमिरेले जानकारी दिनुभयो ।