जेठ ८ , सोलुखुम्बु । जिल्ला प्रशासन कार्यालय सोलुखुम्बुले हाल सम्म ४५ जना गैरआवासीय नेपाली नागरिकलाई नागरिकता वितरण गरेको छ । जिल्ला प्रशासन कार्यालयले हाल अन्य मुलुकमा बसोबास गर्दै आएका ४५ जना नेपाली नागरिकलाई नागरिकता वितरण गरेको हो ।
रेडियो एभरेष्टले यो समाचार तयार पारेको मितिसम्म सोलुुखुम्बुमा ४५ जनालाई नागरिकता वितरण गरिएको जिल्ला प्रशासन कार्यालय सोलुखुम्बुले जनाएको छ । जिल्ला प्रशासन कार्यालय सोलुखुम्बुका सहायक प्रमुख जिल्ला अधिकारी एंव सूचना अधिकारी सरोज अर्यालका अनुसार गत बर्ष २०८० सालमा ८ जना महिला तथा २७ जना पुरुष गरी कुल ३५ लाई नागरिकता प्रदान गरिएको थियो, भने यस बर्षको बैशाख महिनाको अन्त्य सम्म ३ जना महिला र ७ जना पुरुषलाई नागरिकता वितरण गरिएको हो ।
सम्पूर्ण प्रक्रिया पूरा गरेर गैरआवासीय नागरिकताको प्रमाणपत्र जिल्लाबाट पाउने व्यवस्था रहेको उल्लेख गर्दै जिल्ला र देशको विकासका लागि आफूले सक्दो सहयोग गर्ने प्रतिबद्धता व्यक्त व्यक्त गर्नुभएको छ । सोलुखुम्बु जिल्लाबाट गत बर्ष २०८० साल कार्तिक महिना देखि गैरआवासीय नेपाली नागरिकता वितरण गर्न सुरु गरिएको हो ।
ऐनअनुसार सार्क राष्ट्रबाहेकका स्थानमा बसोबास गर्ने नेपाली नागरिकले नागरिकता त्यागेर गैरआवासीय नागरिकता प्राप्त गर्न सक्ने प्रावधान छ । साबिकको नागरिकताको प्रमाणपत्र वा त्यागेका प्रमाणपत्र, विदेशी नागरिकताको प्रमाणपत्रको निस्सासहित प्रशासन कार्यालयमा आवदेन दिनुपर्छ । सोही आधारमा आवश्यक प्रक्रिया पूरा गरेपछि गैरआवासीय नागरिकलाई नागरिकता दिन सकिनेछ। ऐनको दफा ७ (क) अनुसार गैरआवासीय नेपाली नागरिकता प्राप्त गर्न सकिनेछ ।
उपदफा १ अनुसार विदेशी मूलको नागरिकता प्राप्त गरी दक्षिण एसियाली क्षेत्रीय सहयोग संगठन सदस्य राष्ट्रबाहेकका देशमा बसोबास गरेको र साविक वंशज वा जन्मका आधारमा निज वा निजका बुबा वा आमा, हजुरबुबा वा हजुरआमा नेपालको नागरिक रही पछि विदेशी नागरिकता प्राप्त गरेको व्यक्तिले आर्थिक, सामाजिक तथा सांस्कृतिक अधिकारको उपभोग गर्न पाउनेगरी गैरआवासीय नेपाली नागरिकता प्राप्त गर्न सक्ने छ । नागरिकता पाउनेले नेपालको संविधान र कानुनको परिपालना गर्ने लिखित प्रतिबद्धतासमेत गर्नुपर्ने प्रावधान रहेको छ ।
Discussion about this post