सृजनशिल युवा समाजद्वारा पन्चनका अग्नि पीडितलाई आर्थिक सहयोग

जेठ ८, सोलुखुम्बु ।  सृजनशिल युवा समाज काङ्गेल सोलुखुम्बुले पन्चनका अग्नि पीडित लाई आर्थिक सहयोग गरेको छ । सोमबार सृजनशिल युवा समाजले पीडित परिवारलाई १ लाख ५७ हजार ५ सय रुपैँया आर्थिक सहयोग गरेको हो । गत बैशाख १९ गते पन्चनमा आगलागि हुँदा क्षेति व्यहोरेका पिडित परिवारलाई राहत कोषमा जम्मा भएको रकम हस्तान्तरण गरेको सृजनशिल युवा समाज काङ्गेल सोलुखुम्बुका केन्द्रिय सचीव प्रकाश राईले जानकारी दिनुभयो ।

उहाँका अनुसार गत बैशाख ३१ गतेका दिन थुलुङदुधकोशी गाउँपालिका अध्यक्ष असिम राई र वडा नम्बर ३ का वडा अध्यक्ष इन्द्रमणी दाहाल, सृजनशिल युवा समाज काङ्गेल सोलुखुम्बुका उपाध्यक्ष मनेन्द्र राई, केन्द्रिय सचीव प्रकाश राई र सल्लाहकार सदस्य धन्दिराम राई, हिरे राई लगायतको उपस्थितिमा गरिएको निर्णय बमोजिम सहयोग गरेको हो ।

आर्थिक सहयोग संगै सस्थाको काठमाडौ सम्पर्क समितिका सल्लाहकार नेत्र बहादुर बस्नेतले सृजनशिल युवा समाजलाई प्रदान गरेको सेल्टर बक्स समेत राहत स्वरुप पीडित परिवारलाई प्रदान गरिएको छ । समाजले “सामाजिक सहयोग र एकतामा योगदान, विपदमा सृजनसिल युवा समाजको श्रमदान“ भन्ने संस्थाको मुल उदेश्यका साथ अग्निपीडित परिवारलाई घर निर्माणको लागि जेष्ठ ५ गते देखि युवा दक्ष जनशक्ति द्वारा श्रमदान गर्दै आएको सृजनशिल युवा समाज काङ्गेल सोलुखुम्बुका केन्द्रिय सचीव प्रकाश राईले जानकारी दिनुभएको छ ।