फेरि अमेरिकामा अर्को विमान दुर्घटना

माघ १९, साेलुखुम्बु । शुक्रबार साँझ अमेरिकाको उत्तर-पूर्वी फिलाडेल्फियाको एक मलनजिकै ६ जना यात्रु भएको एअर एम्बुलेन्स दुर्घटना भएको छ । अन्तर्राष्ट्रिय सञ्चार माध्यमका अनुसार  जेट शुक्रबार साँझ मेडिकल ट्रान्सपोर्ट मिसनमा थियो ।

जेटमा चालक दलका ४ सदस्य, एक बाल रोगी र उनका अभिभावक थिए। जेट रेस्क्यु एयर एम्बुलेन्सले आफ्नो विमानमा सवार कोही पनि जीवित रहेको पुष्टि गर्न नसकेको बताएको छ।

उत्तर-पूर्वी फिलाडेल्फियामा विमान धेरै भवनहरूमा ठोक्किएकाे छ, साथै घरहरू र सवारी साधनहरूमा आगजनी भएको छ, र जमिनमा मानिसहरू समेत घाइते भएका छन्। 

गत बुधबार राति मात्रै अमेरिकाको राजधानी वासिङ्टन डीसीमा विमान र सैन्य हेलिकप्टर आकासमा ठोकिएर खस्दा ६७ जनाको ज्यान गएको थियो।