सोलुखुम्बुका २ घर हावाहुरीले उडायो, परिवारकाे बिचल्नी 

माघ १९, सोलुखुम्बु । हिमाली जिल्ला सोलुखुम्बुका विभिन्न स्थानमा २ दिनमा हावाहुरीले २ टा घरको छाना उडाएको छ ।  जिल्लाको सोलुदुधकुण्ड नगरपालिका २ इदिङ भन्ने स्थानका फुलल्हामु शेर्पाका घर शुक्रबार हावाहुरीले उडाएको थियो ।

उनको ढुङ्गामाटोले बनेको टिनको छानो भएको २ थले घरको छाना निरन्तरको हावाहुरीले उडाएको जिल्ला प्रहरी कार्यालय सोलुखुम्बुले जनाएको छ ।  शुक्रबार राती करिव ९ः३० तिर चलेको हुरीबतासले शेर्पाको घरको आधा छानो उडाइदिएको जिल्ला प्रहरी कार्याललय सोलुखुम्बुले जनाएको छ ।  यसैबीच शनिबार पनि हुरीबतासले सोलुखुम्बुको एक घरको छानो उडाइदिएको छ । सोलुदुधकुण्ड नगरपालिका ३ लोदिङका आङ्गकामी शेर्पाको घरकाे छानो निरन्तरको हावाहुरीले उडाएको प्हरीले जनाएको हो ।

 उनको २ तले घरको टिनको छानो हावाहुरीले उडाएको जानकारी प्रहरीले करिव ११ बजे पाएपछि अस्थाई प्रहरी चौकी तामाखानीबाट खटिएको प्रहरीटोली पुगेर निरिक्षण गरेको थियो ।  हावाहुरीबाट क्षति व्यहोरेको दुबै परिवारमा मानवीय वा पशुचौपाया क्षति भने नभएको जिल्ला प्रहरी कार्यालय सोलुखुम्बुका प्रहरी प्रमुख डीएसपी द्वारिका प्रसाद घिमिरेले बताउनुभयो । जिल्लाको उच्च हिमाली क्षेत्रमा पछिल्लो समय हावाहुरीले ताण्डव मच्चाइरहेको छ ।