कुम्भ मेलाबाट फर्किँदै गरेको जिप दुर्घटना, पाँच नेपालीको मृत्यु

माघ, १९ साेलुखुम्बु ।  भारतको मुजफ्फरपुर सदरथाना क्षेत्रको मादापुर फोरलाइन सडक खण्डमा जिप दुर्घटना हुँदा पाँच जनाको मृत्यु भएको छ ।

विहारको कुम्भ मेलाबाट फर्किने क्रममा भएको दुर्घटनामा परि महोत्तरीका एकै परिवारका चार र चालक सहित पाँच जनाको मृत्यु भएको हो । दुर्घटनामा चार जना गम्भीर घाइते भएका छन् ।

तिव्र गतिमा रहेको बीआर ३२ पिए ४६६१ नम्बरको स्कर्पियो जिप विपरित दिसाबाट आउँदै गरेको मोटसाईकललाई जोगाउन खोज्दा अनियन्त्रित भई सडकमै पल्टिएर दुर्घटना ग्रस्त भएको प्रभात खबर दैनिकका पत्रकार विजय नारायण मिश्रले जानकारी दिनुभयो ।

महोत्तरीको मनरा शिश्ववा-२ कट्टी घर भएका ६० वर्षिय बालकृष्ण झा, ५० वर्षिया ईन्दु देवी, ५५ वर्षिय मनतारण देवी, ३० वर्षिय अर्चना झा र नाम थर नखुलेका जिप चालक सहित पाँच जनाको मृत्यु भएको हो । मृत्यु हुने चार जना एकै परिवारको रहेको जनाइएको छ ।

मुजफ्फरपुर सदरथाना क्षेत्रको मादापुर फोरलाइन सडक खण्डमा रहेको मधुबनी मंदिर नजिक दुर्घटना भएको पत्रकार मिश्रले बताउनु भएको छ । दुर्घटनामा घाईते भएका ३० वर्षिय मनोहर कुमार झा , २५ वर्षिय कामनी झा, ७ वर्षिय श्रृष्टि झा र ५० वर्षिय जगतारण देवीको उपचार एसकेएमसिएच अस्पतालमा भई रहेको जनाइएको छ ।

घटनाबारे थप जानकारी लिने प्रयास भइरहेको प्रहरी नायव उपरिक्षक सन्तुलाल जयसरवारले बताउनु भयो ।