खुम्बु क्षेत्र जोड्ने सडकमा मोटरेबल पुल निर्माण

माघ २३, सोलुखुम्बु । सोलुखुम्बुको सोलुदूधकुण्ड नगरपालिका–१ टाक्सिन्दु र माप्यदूधकोशी गाउँपालिका–१ जुभिङको छिर्दी घाटस्थित दूधकोशी नदी मोटरेबल पुल निर्माण कार्य सम्पन्न भएको छ । करिब साढे दुई वर्षअघि सोलुदूधकुण्ड नगरपालिकाका मेयर नाम्गेलजाङ्बु शेर्पाले शिलान्यास गरी निर्माण थालिएको पर्यटकीय मार्गमा पर्ने उक्त पक्की पुल महादेव खिम्ती हिराचन जेभीले सात करोड ६ लाख ३३ हजार रुपियाँको लागतमा निर्माण सम्पन्न भएको हो ।

प्राविधिक र भौगोलिक हिसाबले दिगो र मजबुत पुल निर्माण गरिएको मेयर शेर्पाले दाबी गर्नुभयो । सदरमुकाम सल्लेरी, माप्य हुँदै खुम्बु जोड्ने सडक खण्ड भएकाले दूधकोशी नदीमाथि बनेको यो मोटरेबल पुलले माथिल्लो सोलुको पर्यटन क्षेत्रमा धेरै सहयोग पुग्ने मेयर शेर्पाले विश्वास लिनुभएको छ । ५० मिटर लम्बाई र ११ मिटर चौडाइ रहेको पुल फ्रि स्ट्रेच प्रविधिबाट बनाइएको निर्माण कम्पनीका प्रतिनिधि बुद्धिबहादुर मगरले बताउनुभयो ।

काम शुरु गरेपछि तीव्र गतिमा निर्माण गरी गुणस्तरीय पुल तयार भएको उहाँको भनाइ छ । सम्झौता केही वर्ष अघि भए पनि निर्माण स्थलसम्म पुग्ने सडकमा यातायातका साधन चल्न नसकेका कारण सामान ढुवानी गर्न नपाउँदा निर्माण सुरु गर्न केही ढिला भएको हो । पुल निर्माण भएपछि खुम्बु क्षेत्रमा सहज ढुवानी हुने भएकाले दैनिक उपभोग्य सामाग्रीहरूको मूल्य समेत सस्तिने स्थानीयहरुको भनाई छ ।