खोटाङको दिक्तेल बजारमा मिनी महोत्सव हुने

खोटाङ संवाददाता – उदिम चाम्लिङ राई । खोटाङको दिक्तेलबजारमा मिनि महोत्सव हुने भएको छ । नमुना स्पोर्टस क्लब लफ्याङको आयोजनामा फागुन १ गतेदेखि १६ गतेसम्म प्रथम मझुवागढी कालिका भगवती मिनी महोत्सव हुने भएको हो । दिक्तेलको बेसक्यामस्थित जैपुरेडाँडामा शशुल्क सहितको महोत्सव हुने आयोजकले माघ २४ गते दिक्तेलमा पत्रकार सम्मेलन गरेर जानकारी दिएको छ ।

महोत्सवमा स्थानीय कृषि मेला प्रदर्शनी, गायन तथा लोक नृत्य, साहित्य तथा कविता वाचन, जिल्लाभरीका खेलाडीमध्ये विद्यागत उत्कृष्ट खेलाडी सम्मान, उत्कृष्ट पत्रकार पुरस्कार, स्थानीय तथा ख्यातीप्राप्त राष्ट्रिय कलाकारहरुको बेजोड प्रस्तुती हुनेछ । रोटे पीङ, मिकी माउस, स्कारपीओ, जम्पिङ, तीरबोट, हात्तीघोडा रेस, घडी चिठ्ठा लगायतका खेल महोत्सवको अर्को आर्कषण रहेको नमुना स्पोर्टस क्लबका पूर्वअध्यक्ष काजीमान राईले जानकारी दिनुभयो । महोत्सवमा बाहिरका व्यापार, व्यवसायीलाई बन्देज गरिनेछ।

स्थानीय उत्पादनलाई प्रवद्धन गरिने, दिक्तेलबजार र यहाँका व्यापार व्यवसायलाई प्रवद्धन गर्ने उद्देश्य महोत्सवको रहेको जनाईएको छ । सबै पक्षलाई समेटेर समग्रमा महोत्सवलाई बहुआयमिक बनाईने लक्ष्य राखिएको मिनी महोत्सव संयोजक राजेन्द्र राईले बतानुभयो । राईका अनुसार १६ दिने महोत्सवमा दुई करोडमाथिको व्यापार व्यवसाय हुने अनुमान गरिएको छ । महोत्सवमा प्रत्येक दिन राष्ट्रिय कलाकारहरुको प्रस्तुती रहनेछ ।

गायक राजेशपायल राई, शम्भु र्राइ, गायिका एलिना चौहान, बबिना किरातीसहित भ्वाईस अफ नेपालमा प्रतिस्पर्धा गरिरहेका खोटाङका गायकहरुले महोत्सवमा प्रस्तुती दिने क्लबका अध्यक्ष सविन राई विज्ञानले बताएका छन् । हाँस्य कलाकार दीपाश्री निरौला सहितको टीमलाई पनि महोत्सवमा ल्याईने बताउनु भयो ।