केदार माविबाट उडाइएको बलुन सोताङ गाउँपालिकामा अवतरण, बेलुन देख्ने राईलाई सम्मान गरिदै

माघ ३०, सोलुखुम्बु । सोलुखुम्बुको नेचासल्यान गाउँपालिका स्थित केदार माविबाट उडाइएको बेलुन सोताङ गाउँपालिकामा अवतरण गरेको छ । विद्यालयको ६४ औं वार्षिकोत्सव तथा २८ औं अभिभावक दिवसका दिन उडाइएको बेलुन सोताङ गाउँपालिकामा अवतरण गरेको केदार माविका शिक्षक तथा सूचना अधिकारी सुवास भण्डारीले जानकारी दिनुभयो ।

माघ २८ गतेका दिन प्रमुख अतिथी नेचासल्यान गाउँपालिकाका उपाध्यक्ष विना राईले उद्घाटनका क्रममा उडाउनुभएको शुभकामना कार्डसहितको बेलुन सोताङ –४ गोम्दामा पुगेको उहाँको भनाई छ । उक्त बेलुन गोम्दा निवासी रिताकला राईका ३४ महिनाका छोरा एलेक्स राईले आकासमा उडिरहेको देखेका थिए । बालकौतुहलता सहित हेरिरहेकै बेला केहिछिनमा उक्त बेलुन बासुकी आधारभूत विद्यालय छेउमा सफलतापूर्वक अवतरण भएको जनाइएको छ । नेचाबाट मध्यान्ह १२ः १५ बजे तिर उडाईएको उक्त बेलुन सोहि दिन दिउँसो १ः४५ वजे सोताङ पुगेको थियो ।

यस दुर्लभ संयोगलाई सम्मान गर्दै यस केदार मा.वि.ले स–सम्मान एलेक्स राईलाई नगद दुई हजार रूपैयाँ पुरस्कार प्रदान गर्ने घोषणा गरेको छ । यस विशेष बेलुन विद्यालयका विज्ञान शिक्षकहरू सिताराम फुयल, सुभाष अधिकारी, विशेष राउत र सपना शर्माद्वारा हाइड्रोजन ग्यास भरी तयार पारिएको थियो भने, विद्यालयका बरिष्ठ प्रशिक्षक ई. देवकुमार पैकराद्वारा शुभकामना कार्ड तयार गरी धागोले बाँधिएको थियो ।