ताप्ली गाउँपालिकामा ८ सय बढी किशोरीहरुले लगाए एचपिभि खोप

माघ ३०, सोलुखुम्बु । उदयपुरको ताप्ली गाउँपालिकामा ८ बढी किशोरीहरुले एचपिभि खोप लगाएका छन् । २२ गतेदेखि २८ गतेसम्म सञ्चालन भएको एचपीभी खोप ताप्लीमा ८१९ जना किशोरीहरुले लगाएका हुन् । गाउँपालिकाको ५ वटै वडाको विद्यालयमा अध्यनरत कक्षा ६ देखि कक्षा १० सम्म र विद्यालय बाहिर रहेका १० देखि १९ वर्ष उमेर समूहका किशोरीहरुलाई खोप लागाइएको सहकर्मी ठविन्द्र मगरले जानकारी दिनुभयो ।

कक्षा ६ का १४३ जना किशोरी, कक्षा ७ देखि १० सम्मका ५३८ जना किशोरी र विद्यालय बाहिरका १३८ जना गरि कुल ८१९ जना किशोरीहरुलाई एचपिभि खोप लगाईएको स्वास्थ्य शाखा प्रमुख राजेश दनुवारले जानकारी दिनुभयो । किशोरीहरूमा हुने पाठेघरको मुखको क्यान्सरको रोकथाम गर्ने उद्धेश्यले राष्ट्रिय खोप अभियानकै रुपमा देशव्यापी संचालन भईरहेको खोप ताप्लीको बिद्यालयमा अध्ययनरत बिद्यार्थीहरुलाई बिद्यालयमा र बिद्यालय बाहिर रहेका किशोरीहरुलाई खोपकेन्द्र र स्वास्थ्य संस्थामा एचपिभि खोप लगाईएको उहाँको भनाई छ ।

खोप संचालन गर्नु पूर्व पालिकास्तरीय, वडास्तरीय खोप समिति, विद्यालयका शिक्षक र बिद्यार्थीहरुलाई खोपको बारेमा अभिमूखीकरण कार्यक्रम गरि सबैमा जनचेतना प्रवाह गरेर खोप संचालन गरिएको थियो । खोप संचालन गर्न स्वास्थ्य चौकीका स्वास्थ्य कर्मचारी, विद्यालयका शिक्षक, शिक्षिकाहरुको महत्वपूर्ण योगदान रहेको स्वास्थ्य शाखाको भनाई छ साथै स्वास्थ्य चौकीको स्वास्थ्यकर्मीहरु, सम्बन्धित विद्यालयका शिक्षक शिक्षिका र महिला स्वास्थ्य स्वयं सेविकाहरुलाई आगामी दिनहरुमा पनि समन्व, सहयोग साथै सहकार्य गर्ने समेत आशा राख्दै स्वास्थ्य शाखा प्रमुख दनुवारले धन्यवाद व्यक्त गर्नुभएको छ ।