विश्व रेकर्डका लागि सोलुखुम्बुको कालापत्थरमा निर्देशकद्वयको नृत्य

जेठ ९, सोलुखुम्बु । नृत्य निर्देशकद्वय सुरेन्द्र राई र सुशन तामाङले गिनिज विश्व रेकर्डका लागि सोलुखुम्बुको कालापत्थरमा जोडीले नृत्य गर्नुभएको छ । ‘सर्वाधिक उचाइमा कोरियोग्राफी गरिएको नृत्य’ विधाका लागि उहाँहरुले यो प्रयास गर्नुभएको हो ।

गत आइतबार ५ हजार ४ सय ३८ मिटरको उचाइमा उहाँहरुले दीपक बज्राचार्यको गीत ‘मन मगन’ मा २ मिनेट ३० सेकेन्डसम्म नृत्य गर्नुभएको थियो । उहाँहरुको टोलीमा फोटोग्राफर सौगात कार्की र भिडियोग्राफरद्वय उमेश सापकोटा तथा सोनम केसी हुनुहुन्छ । सुरेन्द्र र सुशनले सगरमाथा राष्ट्रिय निकुञ्ज, नेपाल पर्यटन बोर्ड र खुम्बु पासाङल्हामु गाउँपालिकाको स्वीकृतिमा कार्यक्रम गरेको नृत्य निर्देशक संघ जिल्ला शाखा काठमाडौंका सचिव ममता राईले जानकारी दिनुभयो ।

उहाँका अनुसार गिनिजको तर्फबाट नेपाल प्रतिनिधि चित्रकुमार कार्कीको निर्देशनमा उहाँहरुले कार्यक्रम गर्नुभएको थियो । कार्यक्रमको छायांकनका प्रमाण र अन्य प्रमाण गिनिजको लण्डन मुख्यालयमा पठाइने भएको छ ।