खोटाङको रावाबेसी गाउँपालिका लिजा मूल्याङ्कनमा जिल्लाकै पहिलो, दावि गर्यो ९९ दशमलव ७५ अङ्क 

फागुन ४, सोलुखुम्बु ।  खोटाङको रावाबेसी गाउँपालिकाले स्थानीय तह संस्थागत क्षमता मुल्याङ्कनमा देशकै दोश्रो दावी गरेको छ । संघीय मामिला तथा सामान्य प्रशासन मन्त्रालयले सार्वजनिक गरेको देशभरका स्थानीय तहको संस्थागत क्षमता स्व मूल्यांकन (लिजा) मा खोटाङको उक्त गाउँपालिकाले जिल्लाको उत्कृष्ठ दावी गरेको हो भने देशको दोश्रो स्थानमा दावी गरेको हो ।  विभिन्न विषय क्षेत्र समेटेर १०० अंकभारमा मूल्याङ्कन गरिने लिजामा यो पालिकाले आफुलाई ९९.७५ नम्बर दिएको छ ।

गाउँपालिकाले यस वर्षको लिजा मूल्याङ्कनमा शासकीय प्रवन्धमा १ सय, संगठन तथा प्रशासनमा ९६ दशमलव ८८, बार्षिक बजेट तथा योजना व्यवस्थापनमा १ सय, वित्तिय एवं आर्थिक व्यवस्थापन, सेवा प्रवाह, न्यायिक कार्य सम्पादन, भौतिक पूर्वाधार विकास, सामाजिक समाबेसीकरण, वाताबरण संरक्षण तथा विपद व्यवस्थापन, सहकार्य र समन्वय मा शतप्रतिशत अंक आफूलाई दिएको छ ।  स्थानीय तह आफैँले आफैँलाई दिएको नम्बरलाई  संघीय मामिला तथा सामान्य प्रशासन मन्त्रालयको विज्ञ टोलीले गुणस्तर परीक्षण (क्युएए) गरेर पछि अन्तिम नतिजा प्रकाशन हुन्छ ।

यसकारण हाल स्थानीय तहले आफ्ना वेबसाइटमार्फत सार्वजनिक गरेर लिजाको अनलाइन प्रणालीमा समावेश गरेको नतिजा भने अन्तिम होइन । स्थानीय तहहरुले निश्चित मापदण्डको आधारमा गरेको स्व मूल्यांकनलाई मन्त्रालयले गुणस्तर परीक्षण गरेपछि अन्तिम नतिजा सार्वजनिक हुन्छ  । स्थानीय तहहरूको कार्यप्रकृया र उपलव्धिको लेखाजोखा गरी शासकीय र विकास व्यवस्थापनमा गर्नुपर्ने सुधारका क्षेत्र पहिचान गर्न स्व मूल्यांकन गरिदै आएको छ । लिजाले स्थानीय तहको आवधिक समीक्षाको आधार प्राप्त हुने र स्थानीय सरकारबीच यी प्रकृयामा प्रतिस्पर्धा गराउने काम गर्छ ।