सोलुमा ६ दशमलव ४५ हेक्टर वन क्षेत्र अतिक्रमणको चपेटामा

फागुन ५, सोलुखुम्बु । हिमाली जिल्ला सोलुखुम्बुमा ६ दशमलव ४५ हेक्टर वन क्षेत्र अतिक्रमणको चपेटामा परेको छ । जिल्ला वन कार्यालय सोलुखुम्बुका अनुसार जिल्लाको चार स्थानिय तहमा ६ दशमलव ४५ हेक्टर वन क्षेत्र अतिक्रमणको चपेटामा परेको हो । वि.सं २०५१ सालमा नेचासल्यान गाउँपालिका २ ओस्ती स्थित धनवीर काँचापाते सामुदायिक वनको २ दशमलब शुन्य हेक्टर, वि.सं २०४९ सालमा थुलुङ दुधकोशी गाउँपालिका वडा नम्बर ८ बुढीडाँडा स्थित सेर्सादु सामुदायिक वनको एक हेक्टर क्षेत्रफल अतिक्रमण गरि घर निर्माण गरिएको डिभिजन वन कार्यालय सोलुखुम्बुका सूचना अधिकारी मन राज राईले जानकारी दिनुभयो ।

उहाँका अनुसार वि.सं २०५५ सालमा सोलुदुधुकण्ड नगरपालिका वडा नम्बर ३ स्थित जसमानेभञ्ज्याङ स्थित पिके सामुदायिक वनको शुन्य दशमलव ५ हेक्टर वन अतिक्रमण गरिएको हो । यस्तै विं.स २०५५ सालमा लिखुपिके गाउँपालिका ५ बेस क्याम्प स्थित पिके ल्हाप्सङ कर्मो सामुदायिक वनमा २ दशमलव ८ हेक्टर र २०४५ सालमा सोलुदुधकुण्ड नगरपालिका वडा नम्बर १० सामुचे स्थित निम्नासा डाँडा सामुदायिक वनको शुन्य दशमलव ५ हेक्टर क्षेत्रफलको वन अतिक्रमण गरी घर तथा टहरा निर्माण गरिएको डिभिजन वन कार्यालय सोलुखुम्बुले जनाएको छ । उक्त वन फिर्ता ल्याउनका लागि पहल गरिरहेको डिभिजन वन कार्यालय सोलुखुम्बुका प्रमुख रामजी शाहले बताउनुभयो ।