बुद्ध जयन्तीको अवसरमा थेक्छेन पेमा छोलिङ गुम्बाद्धारा धार्मिक प्रवचन तथा अन्तरक्रिया

जेठ ९, सोलुखुम्बु । सोलुखुम्बुमा २५६८ औ बुद्ध जयन्तीको अवसरमा धार्मिक प्रवचन तथा अन्तरकृया कार्यक्रम सुरु गरिएको छ । थेक्छेन पेमा छोलिङ गुम्बा सोलुखुम्बुको आयोजनामा जिल्ला समन्वय समितिको समिक्षालय हलमा आज धर्म र अभ्यासको दैनिक जीवन सङ सम्बन्ध र महत्वको गोष्ठी तथा अन्तर्कृया कार्यक्रम आयोजना गरेको हो ।

विश्वमा परिचित सिद्धार्थ गौतमको २५६८ औँ जयन्तीको अवसरमा आज धर्म र अभ्यासको दैनिक जीवनसँग सम्बन्ध र महत्व गोष्ठी तथा अन्तरक्रिया कार्यक्रमको आयोजना गरिएको थेग्छेन पेमा छोलिङ गुम्बा व्यवस्थापन समितिका सचिव ङिमा तेन्डुप शेर्पाले जानकारी दिनुभयो । अन्य समयमा भन्दा बैशाख पूर्णिमाका दिन गरिएको प्रवचन लगायतका कार्यक्रम विशेष रहने उहाँको भनाई छ । बुद्ध जयन्तीको अवसरमा सहायक धर्माचार्य राजेश खड्का (करुणा वज्र) ले प्रवचन प्रदान गर्नुभएको छ ।

२०५२ सालमा स्थापना गरिएको सोलुदुधकुण्ड नगरपालिका वडा नम्बर ५ सल्लेरीमा अवस्थित थेक्छेन पेमा छोलिङ गुम्बामा लुम्बिनीमा रहेको माया देवी मन्दिर र अशोक स्तम्भ निर्माण गर्ने योजना रहेको गुम्बा व्यवस्थापन समितिले जनाएको छ । सदरमुकामलार्ई अन्तर्राष्ट्रिय पर्यटकको मुख्य आकर्षणको केन्द्र बनाउने उद्देश्यले गुरु योजनाका साथ विभिन्न भौतिक संरचनाहरू निर्माण गरिने उल्लेख गरिएको छ । गुम्बा क्षेत्र भित्र ध्यान स्थल, विश्राम स्थल, पार्क, सभा हल, पुस्तकालय, विद्यार्थीहरूका लागि आवास गृह लगायतका भौतिक संरचनाहरु निर्माण गरिने भएको छ ।

विदेशमा रहेका नेपालीहरूको आर्थिक सहयोगमा प्रवेशद्वार निर्माणको कार्य सुरु भइसकेको छ । गुम्बाको हरेक गतिविधि जानका लागि थेक्छेन पेमा छोलिङ गुम्बाको नाममा आजबाट वबसाइट समेत खोलिएको छ । भोली बुद्ध जयन्तीको दिन बिहान विभिन्न जाति र समुदायको झाँकी प्रदर्शन गर्दै र्यालि सहित सल्लेरी बजार परिक्रमा गरिने थेग्छेन पेमा छोलिङ गुम्बा व्यवस्थापन समितिले जनाएको छ ।