फागुन ९, सोलुखुम्बु । हिमाली जिल्ला सोलुखुम्बुका ९० प्रतिशत किशोरीलाई पाठेघरको मुखमा लाग्ने क्यान्सर विरुद्वको (एच.पि.भि.) खोप लगाइएको छ । जिल्लाको एक नगर र ७ गाउँपालिका गरी ८ वटा स्थानीय तहका १० देखि १४ वर्ष उमेर समूहका किशोरीलाई अभियान सञ्चालन गरिएको जिल्ला स्वास्थ कार्यालय सोलुखुम्बुले जनाएको छ ।
यता खुम्बु पासाङल्हामु गाउँपालिकाका विद्यालयमा जाडो बिदा भएका कारण अभियान संचालन गर्न नसकिएको र विद्यालय खुल्न साथ खोप लगाइने जिल्ला स्वास्थ्य कार्यालय सोलुखुम्बुका प्रमुख सुमन तिवारीले बताउनुभयो । जिल्लामा खोप अभियानमा विद्यालय जाने कक्षा ६ देखि १० सम्मका र विद्यालय बाहिरका १० देखि १४ वर्ष उमेर समूहका गरी ९० प्रतिशत किशोरीलाई खोप अभियानमा सहभागी गराइएको छ ।
यो खोप लगाएपछि १५ वर्षसम्म पाठेघरको मुखमा लाग्ने क्यान्सरको जोखिम नहुने स्वास्थ्यकर्मीहरुले बताएका छन् । नेपाल सरकारले देशव्यापी रुपमा पाठेघरको मुखमा लाग्ने क्यान्सर रोग न्यूनीकरणका लागि अभियान चलाउने घोषणा गरेसँगै सोलुखुम्बु जिल्लाले किशोरीहरुलाई यो खोप दिएको हो ।
जिल्लामा खोपका लागि १ सय ७४ वटा खोप केन्द्र निर्धारण गरिएको थियो ।खोप विद्यालय र तोकिएका केन्द्रमा लगााइएको बताइएको छ । अभियानका लागि महिला स्वास्थ्यकर्मी र स्वयंसेवक खटिएका थिए ।
Discussion about this post