शिक्षा ऐन ल्याउने माग गर्दै शिक्षक महासंघ सोलुले बुझायो ध्यानाकर्षण पत्र

फागुन ९, सोलुखुम्बु । शिक्षक महासंघ सोलुखुम्बुले चालू हिउँदे अधिवेशन बाटै विद्यालय शिक्षा ऐन जारी गरियोस् भन्दै शिक्षा विकास तथा समन्वय इकाई सोलुखुम्बुलाई एक ध्यानाकर्षण पत्र बुझाएका छन् । देशभरका ७ सय ५३ वटै स्थानिय सरकारहरु मार्फत संघीय सरकारलाई बुझाउने गरि जिल्ला स्थित नेपाल शिक्षक महासंघले ध्यानाकर्षण पत्र बुझाएको हो ।

नेपाल शिक्षक महासंघ राष्ट्रिय समितिको गत महिना २२ गते एक प्रेस विज्ञप्ती जारी गर्दै नेपाल सरकार र नेपाल शिक्षक महासंघबीच विभिन्न समयमा भएका सहमती र सम्झौताहरुमा उल्लेखित मागहरु सहितको विद्यालय शिक्षा विधेयक संसदको चालू हिउँदे अधिवेशनबाट पारित गरी जारी गर्न महासंघका स्थानिय, जिल्ला र प्रदेश समितिहरुलाई केन्द्रीय समितिले तोके बमोजिमका दवाव मुलक कार्यक्रम आयोजना गर्न निर्देशन भएबमोजिम शुक्रबार शिक्षा विकास तथा समन्वय इकाईमा ध्यानाकर्षण पत्र बुझाइएको नेपाल शिक्षक महासङ्घ सोलुखुम्बुका अध्यक्ष जनक कुमार थापाले बताउनुभयो ।

उहाँका अनुसार स्थानिय तहहरुमा आन्दोलनलाई व्यवस्थित र मर्यादित बनाउन आन्दोलन परिचालन समिति समेत गठन गरिएको छ । आन्दोलनका कार्यक्रम अन्तरगत फागुन ८ गते हरेक विद्यालयमा अभिभावक,विद्यालय व्यवस्थापन समिति र विद्यार्थीबीच अन्तरक्रिया कार्यक्रम संचालन गर्ने, फागुन ९ गते ७७ वटै जिल्लाको शिक्षा विकास तथा समन्वय इकाइमा र ७ वटै प्रदेशका मुख्यमन्त्री,सामाजिक विकास मन्त्री समक्ष ध्यानाकर्षण पत्र बुझाउने, कालो पट्टि सहित बृहत् जुलुस सभा गर्ने र आन्दोलन परिचालन समिती गठन गर्ने कार्यक्रम रहेको छ ।

देश संघीयतामा गएपनि शिक्षा क्षेत्र भने पन्चायत कालको समयमा बनाइएको शिक्षा ऐन २०२८ बमोजिम नै चलिरहेको छ । संघीयताको मर्म र युग सुहाउँदो ऐन बनाएर शिक्षा क्षेत्रमा आमूल परिवर्तन ल्याउन आवश्यकता रहेकाले चालू हिउँदे अधिवेशनबाट शिक्षा ऐन पास गरि कार्यान्वयनमा ल्याउन नेपाल शिक्षक महासंघका अध्यक्ष थापाले बताउनुभयो ।

शिक्षक महासंघ सोलुखुम्बुबाट आएको ध्यानाकर्षण पत्र सरोकारवाला निकायसंग पेस गर्ने र शिक्षकहरुको माग समयमा पुरा होस् भन्दै २२ बुँदे मागसहितको ध्यानाकर्षण पत्र बुझाएको छ । उक्त ध्यानाकर्षण पत्र शिक्षा विकास तथा समन्वय इकाई सोलुखुम्बुका निमित्त प्रमुख बिर्मा कुमारी डाँगीले बुझाइएको छ ।