रावाबेसी गाउँपालिकामा किसानलाई परिचयपत्र वितरण गरिने

फागुन १२, सोलुखुम्बु । खोटाङको रावाबेशी गाउँपालिकामा किसान परिचय पत्र वितरण तथा विवरण दर्ता शिविर सञ्चालन गरिने भएको छ । गाउँपालिकाले एक सुचना जारी गर्दै किसानहरूको स्थलगत अनुगमन पश्चात् पहिचान गरेर किसान परिचयपत्र वितरण तथा विवरण दर्ता गरिने भएको हो ।

कृषि शाखाको आर्थिक बर्ष २०८१/०८२ को सशर्त तर्फको किसान सुचिकरण कार्यक्रम अन्तर्गत खाद्य तथा खाद्य ऐन, २०७५ को दफा १४ बमोजिम विद्युतीय प्रणाली मार्फत किसानहरुको आवश्यक विवरण संकलन गरी किसान सूचिकरण परिचय पत्र वितरण गरिने गाउँपालिकाले जनाएको छ ।

राष्ट्रिय अभियान अन्तर्गत पालिकामा सूचिकृत भएका किसानहरुको तथ्याङ्क रुजु गरी किसान परिचय पत्र वितरण साथै विवरण भई बाँकी रहेका किसानहरुले फागुन १८ गतेदेखि सञ्चालन हुने घुम्ती शिविर हुने भएको छ ।

शिविर फागुन १८ गते वडा नम्बर १ को कार्यालय कुभिण्डे, १९ गते वडा कार्यालय खार्पा, २० गते वडा कार्यालय लामिडाँडा, २१ गते वडा कार्यालय डुम्रेधारापानी, २२ गते वडा कार्यालय दुवेकोल र २३ गते वडा कार्यालय हौँचुरमा सञ्चालन गरिने भएको जनाइएको छ ।