वित्तीय सुशासन (एफआरए)मा सोलुदुधकुण्ड  अब्बल, जिल्लाकै कमजोर खुम्बु 

फागुन १५, सोलुखुम्बु । स्थानीय तह सुशासन वित्तिय जोखिम मूल्याङ्कनमा सोलुखुम्बुको एकमात्र नगरपालिका सोलुदुधकुण्ड नगरपालिका पहिलो बनेको छ ।  आर्थिक वर्ष २०८०÷८१ मा सोलुदुधकुण्ड नगरपालिका ९९ अङ्क प्राप्त गर्दै जिल्लाकै पहिलो बनेको हो ।  संघिय मामिला तथा सामान्य प्रशासन मन्त्रालयले स्थानीय तहमा हुने आर्थिक अनियमितता एवं वित्तिय जोखिम कम गर्ने उद्देश्यले बनाएकाे कार्यविधि अनुसार सो आर्थिक वर्षमा सोलुदुधकुण्ड नगरपालिकाले उच्च अङ्क प्राप्त गर्दै सुशासन कायम भएको सन्देश दिएको छ ।  

५ वटा विषयक्षेत्रमा गरिने मुल्यङ्नमा नगरपालिकाले योजना तथा बजेट व्यवस्थापनमा २१ पूर्णाङ्कमा २१ अङ्क प्राप्त गरेको छ ।  यस्तै कार्यान्वयन क्षमता तथा व्यवस्थापनको २९ पूर्णाङ्कमा २८, लेखाङ्कन तथा प्रतिवेदनको १७ पूर्णाङ्कमा १७ अङ्क प्राप्त गरेको छ ।  यस्तै अनुगमन मूल्याङ्कन तथा लेखापरीक्षणमा १६ पूर्णाङ्कमा १६ र  राजस्व व्यवस्थापनको १७ पूर्णाङ्कमा १७ अंक प्राप्त गरेको छ ।

 स्थानीय तह सुशासन वित्तिय जोखिम मूल्याङ्कनमा जिल्लामा दोश्रो स्थानमा ९३ दशमलव ५ अंक प्राप्त गर्दै लिखुपिके गाउँपालिका छ भने तेश्रो स्थानमा ८३ दशमलव ५ अंक प्राप्त गर्दै थुलुङ दुधकोशी, चौथो स्थानमा ७८ अङ्क प्राप्त गर्दै महाकुलुङ र पाँचौ स्थानमा खुम्बु पासाङ ल्हामु गाउँपालिका ७३ अङ्कका साथ उभिएको छ ।

 वित्तीय सुशासन जोखिम मूल्यांकनमा सोलुदुधकुण्ड नगरपालिका अव्बल देखिएको छ भने जिल्लाकै कमजोर पालिकाको रुपमा खुम्बु पासाङल्हामु गाउँपालिका देखिएको छ ।  जिल्लाका ८ पालिका मध्ये वित्तीय सुशासन जोखिम मूल्यांकनमा ५ पालिकाको मात्र नतिजा सार्वजनिक भएको छ ।  माप्य, सोताङ र नेचासल्यान गाउँपालिकाको नतिजा भने सार्वजनिक भएको छैन ।