माप्यका १३ विद्यालयका शिक्षक, विव्यस र शिअसंघ प्रतिनिधीलाई बालविकास अभिभुखिकरण 

फागुन १५, सोलुखुम्बु । सोलुखुम्बुको माप्य दुधकोशी गाउँपालिकामा विद्यालय व्यवस्थापन समिति तथा शिक्षक अभिभावक संघका पदाधिकारीलाई बालविकास सम्बन्धी १ दिने अभिभुखिकरण कार्यक्रम सम्पन्न भएको छ ।  गाउँपालिका उपाध्यक्ष गौरव राईको उपस्थितिमा गाउँपालिकाको वडा नम्बर ६ स्थित सगरमाथा माविमा अभिभुखिकरण कार्यक्रम सम्पन्न भएको हो ।

 प्रारम्भिक बालविकासका बालबालिकाहरूको अध्ययनलाई प्रभावकारी बनाउन माप्य दुधकोशी गाउँपालिकाको सहकार्य,  सेतो गुराँस र चाइल्ड एड नेटवर्कको सहयोगमा गाउँपालिकामा सञ्चालित इसिडि हार्मोनी परियोजना अन्तर्गत उक्त अभिभुखिकरण कार्यक्रम गरिएको हो ।  अभिभुखिकरण कार्यक्रमका लागी माप्य दुधकोशी गाउँपालिका वडा नम्बर ६ र ७ का १३ वटा विद्यालयका ३९ जना विव्यस अध्यक्ष, शि.अ संघ अध्यक्ष र प्रधानाध्यापकको उपस्थिति रहेको संवाददाता देवी प्रसाद घिमिरेले बताउनुभयो ।

बालबालिकालाई विद्यालय शिक्षामा जोड्न तथा विद्यालयमा भएका बालबालिकालाई शिक्षासँग जोड्नका लागी अभिभुखिकरण कार्यक्रम प्रभावकारी हुने विश्वास लिइएको छ ।  शिक्षक तथा अभिभावक प्रतिनिधिहरूलाई सेतो गुराँसका कार्यक्रम संयाेजक झपड बहादुर बाेहराले अभिभुखिकरण गराउनुभएको छ भने कार्यक्रमको सभापतित्व वडा नम्बर ६ का वडा सदस्य नरजित राईले गर्नुभएको थियो ।