सोलुखुम्बुका व्यवसायीहरूले ढक, तराजु दर्ता नवीकरण गर्नुपर्ने, नापतौल विभाग सोलुखुम्बु आँउदै 

फागुन १५, सोलुखुम्बु । नापतौल विभागले सोलुखुम्बुका व्यापारीहरूको नापतौल सामाग्री नवीकरण गराउने भएको छ ।  नापतौल विभाग विराटनगरले जिल्लामा आएरनै नापतौल नवीकरण गराउने भएको हो ।  आगामी फागुन १९ र २० गते २ दिन जिल्लामा नापतौल सँग सम्बन्धित काम गर्दै आइरहेका व्यापारी तथा व्यवसायीहरूको नापतौल नवीकरणका लागी विभाग सोलुखुम्बु आउन लागेको जनाइएको छ ।

 उद्योग वाणिज्य सङ्घ सोलुखुम्बु सँगको सहकार्यमा बजारमा कालोबजारी नियन्त्रण र उपभोक्ता अधिकार संरक्षणका लागी संघले नापतौल विभागका कर्मचारी जिल्लामै ल्याएर नवीकरण गराउन लागेको उद्योग वाणिज्य सङ्घ सोलुखुम्बुका अध्यक्ष रामलाल श्रेष्ठले बताउनुभयो ।

पहिल्यै दर्ता भइसकेका नापतौलसँग सम्बन्धित व्यापारीहरूको नापतौल नवीकरण र दर्ता नगरेका व्यवसायीहरूको नापतौल दर्ता हुने जनाइएको छ ।  जिल्लाका हरेक पालिकाका यस्ता व्यापार तथा व्यवसायीहरू सदरमुकाम आएर दर्ता गर्न सकिने जनाइएको छ ।  ढक, तराजु लगायत विद्युतीय नापतौल सामाग्रीहरू दर्ता नगरी व्यवसाय सञ्चालन गर्न नपाइने भएकाले दर्ता गर्न उद्योग वाणिज्यसंघले अनुरोध समेत गरेको छ,।