सल्लेरीमा बजार अनुगमन, करिव १७ हजार बराबरको अखाद्य सामाग्री नष्ट 

फागुन १६, सोलुखुम्बु । जिल्ला प्रशासन कार्यालय सोलुखुम्बुले बजार अनुगमनका क्रममा भेटिएका म्याद गुज्रिएका खाद्य सामाग्री नष्ट गरेको छ ।  गत फागुन ९ गते शुक्रबार जिल्ला प्रशासन कार्यालय सोलुखुम्बुका शाखा अधिकृत नरेन्द्र कुमार श्रेष्ठको संयोजकत्वमा गएको बजार अनुगमन टोलीले सल्लेरी बजारक्षेत्रमा पाइएका अखाद्य बस्तु जफत गरि नष्ट गरिएको हो ।  

घरेलु तथा साना उद्योग कार्यालय सोलुखुम्बु, जिल्ला प्रहरी कार्यालय सोलुखुम्बु लगायत सरोकारवालाहरूको उपस्थितिमा गरिएको अनुगमनका क्रममा बरामद गरिएको करिव १७ हजार बराबरको अखाद्य बस्तु तथा सेवा नष्ट गरिएको जिल्ला प्रशासन कार्यालय सोलुखुम्बुका शाखा अधिकृत श्रेष्ठले बताउनुभयो  । बजार अनुगमनका क्रममा टोलीले राजु स्टोरबाट ४ हजार ६ सय ७८ रुपैयाँ बराबरको अखाद्य तथा म्याद गुज्रिएको सामाग्री बरामद गरेको थियो  ।

यस्तै अपर गुड इन्टरप्राइजेजबाट ५ हजार ६ सय ५० रुपैयाँ, बागलुङ फलफूल पसलबाट ४ हजार ४ सय ६०, राई किराना पसलबाट १ हजार ४ सय ६०, विजय स्टोरबाट ३ सय ५० र  एक तरकारी पसलबाट ७५ रुपैयाँ बराबरको अखाद्य बस्तु जफत गरि नष्ट गरिएको बताइएको छ ।  उपभोक्ताको अधिकार संरक्षण गर्दै अखाद्य बस्तुबाट उपभोक्ताको स्वास्थ्यमा पर्ने असर र कालो बजारी नियन्त्रणका लागी जिल्ला प्रशासन कार्यालयले नियमित बजार अनुगमन गरिरहेको शाखा अधिकृत नरेन्द्र श्रेष्ठको भनाई छ ।