द पाट्र्नर्स नेपालले राईको घरको छानो फेरिदिएपछि

फागुन १९, साेलुखुम्बु  ।   पैसाको अभावमा घरको जीर्ण खरको छानो फेर्न नसकेको एक परिवारलाई द पाट्र्नर्स नेपाल संस्थाले नयाँ टिनको छानो उपलब्ध गराएर सहयोग गरेको छ।

सोलुखुम्बुको महाकुलुङ गाउँपालिका ३ छेस्काम निवासी राजमान राईको परिवार आर्थिक अभावका कारण वर्षौंदेखि चुहिने पुरानो खरको छानामुनि बस्न बाध्य थिए। वर्षातको समयमा पानी चुहिएर बस्नसमेत कठिन भएको विषयमा जानकारी पाएपछि द पाट्र्नर्स नेपाल संस्थाले तत्काल पहल गर्दै नयाँ टिनको छानो फेर्नका लागि एक लाख रुपैयाँ उपलब्ध गराएको छ।

नयाँ छानो पाएपछि राजमान राईले अब पानी चुहिने चिन्ता हट्यो। हाम्रो परिवारले अब सुरक्षित महसुस गरेका छौं भनेर खुसी व्यक्त गर्नु भएकाे छ ।

आइतबार स्थानीय जनप्रतिनिधि तथा बुद्धिजीवीहरुको उपस्थितिमा संस्थाका कोषाध्यक्ष भलाकाजी कुलुङले नगद हस्तान्तरण गर्दै “हाम्रो संस्थाको आकस्मिक सहयोग कार्यक्रम अन्तर्गत सहयोग गरेका छौ । हाम्रो उद्देश्य कमजोर वर्गको जीवनस्तर सुधार्नु हो । आगामी दिनमा पनि यस्ता कार्यक्रमलाई निरन्तरता दिनेछौं भनेर प्रतिबद्धता व्यक्त गर्नुभयो ।

संस्थाको आकस्मिक सहयोग कार्यक्रम अन्तर्गत नै एक जना बिरामीलाई पनि पच्चीस हजार रुपैयाँ नगद सहयोग गरेको छ । छेस्काम कै गृतेराम राईलाई उपचारको लागि नगद सहयोग गरेको सहकर्मी उद्धव कुलुङले जानकारी दिनुभयो।  स्थानीयबासीले पनि संस्थाको सहयोगप्रति आभार व्यक्त गर्दै आगामी दिनमा निरन्तर सहयोगको लागि अनुरोध पनि गरेका छन् ।