सल्लेरीमा सुरु भयो ढक, तराजु तथा जोख्ने उपकरणको नवीकरण 

फागुन १९, सोलुखुम्बु ।  सोलुखुम्बुको सदरमुकाम सल्लेरीमा नापतौल दर्ता तथा नविकरण सुरु भएको छ ।  उद्योग वाणिज्य सङ्घ सोलुखुम्बुको आयोजनामा सङ्घको जिल्ला स्थित कार्यालयमा नापतौल सम्बन्धी उपकरण तथा सामाग्रीको दर्ता एवं नविकरण सुरु भएको हो ।  जिल्लामै नापतौल विभागको सेवा ल्याएर दर्ता नवीकरण गराउँदा सहज भएको बताइएको छ । २०७६ साल यता नवीकरण नगराएका व्यवसायीहरूलाई जिल्लामै नापतौल विभाग झिकाएर दर्ता नवीकरणको काम गराउँदा व्यवसायीहरू समेत उत्साहित छन् ।  हजारौँ खर्च गरेर ढक तराजु लिएर विराटनगर पुगेर दर्ता नवीकरण गराउन झन्झटिलो हुनेभएकाले पनि दर्ता नवीकरण हुन नसकेको अवस्थामा अहिले जिल्लामै सेवा भएको बेला गराउन अघि सर्नुपर्ने उद्योग वाणिज्य संघ सोलुखुम्बुका अध्यक्ष रामलाल श्रेष्ठले बताउनुभयो  ।  उहाँले सोमबार र मङ्गलबार २ दिन सम्म दर्ता नवीकरण हुने भएकाले २ दिन कार्यालय समयसम्म सङ्घको कार्यालयमा आएर दर्ता नवीकरण गराउन सक्ने उल्लेख गर्नुभयो ।  वर्षैपिच्छे गराउनुपर्ने नवीकरण केही वर्ष छुट्दा जरिवाना लाग्ने भएपनि सङ्घले सहजिकरण गरेर कमसेकम राजस्व छुटमा नवीकरण गराइरहेको उहाँले बताउनुभयो ।