फाप्लु विमानस्थलमा ‘रिफ्युलिङ सेन्टर’ स्थापनाका लागि मेयरसहितको प्राविधिक टोली निस्किए स्थलगत निरिक्षणमा

फागुन २२, सोलुखुम्बु । हिमाली जिल्ला सोलुखुम्बुको फाप्लु विमानस्थलमा ‘रिफ्युलिङ सेन्टर’ स्थापनाका लागि सोलुदुधकुण्ड नगरपालिकाका मेयर नाम्गेल जाङबु शेर्पा सहित प्राविधिकको टोलीले निरीक्षण गरेका छन् । बिहिबार नेपाल आयल निगमको प्राविधिक टोली र मेयर शेर्पाले स्थलगत निरीक्षण गरेका हुन् ।

निरीक्षणका क्रममा परियोजना कार्यान्वयनको सम्भावना अध्ययन गरिएको जनाइएको छ । पर्यटन सिजनमा खुम्बु क्षेत्रको मौसम बारम्बार परिवर्तन हुँदा हवाई उडानहरू रद्द हुने गरेको छ । फाप्लुमा नियमित उडान नहुदाँ सोलुखुम्बु जिल्लाको तल्लो क्षेत्रको पर्यटन पनि प्रभावित भएको छ । जसले स्थानीय यात्रुहरूको हवाई यात्रा र आकस्मिक उद्धारमा समस्या सृजना गरेको निरीक्षणका क्रममा सोलुदुधकुण्ड नगरपालिकाका मेयर नाम्गेल जाङ्बु शेर्पाले बताउनुभयो ।

उक्त समस्याको समाधानका लागि, हालका रामेछाप लुक्ला र फाप्लुको सट्टा सिधै काठमाण्डौं–फाप्लु र फाप्लु–लुक्ला उडानको लागि सोलुदुधकुण्ड नगरपालिका स्थित फाप्लु एयरपोर्टलाई हवाई उडानको मुख्य केन्द्र बनाउनुपर्नेमा उहाँले जोड दिनुभएको छ । ‘रिफ्युलिङ सेन्टर’ निरिक्षणमा नेकपा एमाले सोलुखुम्बुका अध्यक्ष डुफकुमार बास्तोला, रक्षामन्त्री राईका स्वकीय सचिव बच्चुनारायण श्रेष्ठ लगायतको उपस्थिती रहेको थियो ।