सोताङ विकास ः ७० लाख बजेटमा १५ किलोमिटर सडक विस्तार 

जेठ १०, सोलुखुम्बु । सोलुखुम्बुको सोताङ गाउँपालिकाबाट थुलुङ दुधकोशी गाउँपालिकाको लोखीम कुरीमा जोड्ने सडक ट्राक ओपनको काम यो वर्ष सम्म १५ किलोमिटर सम्पन्न भएको छ ।  गत आर्थिक वर्ष २०७९÷८० बाट सुरु भएका  धोद्रे, पाथिभरा हुँदै थुलुङ दुधकोशीको कुरीमा जोड्ने सडक ट्राक ओपनको काम यो चालु आर्थिक वर्ष सम्म आइपुग्दा १५ किलोमिटर सम्पन्न भएको हो ।

सोताङ गाउँपालिकाको वडा नम्बर ४ स्थित सुस्ला आधारभुत विद्यालयबाट अहिले चित्रे गुम्बा सम्म सडक ट्राक ओपन भइसकेको छ भने अब लोखीम जोड्नको लागी ५ किलोमिटर सडक विस्तार गर्नुपर्ने गाउँपालिकाका अध्यक्ष खिलराज बस्नेतले जानकारी दिनुभयो । यो सडक ट्राक ओपनका लागी गाउँपालिकाको हाल सम्म ७० लाख बढी बजेट खर्च भइसकेको छ भने लोखीम जोड्न का लागी आउने आर्थिक वर्षमा थप बजेट विनियोजन गरेर काम पुरा गरिने अध्यक्ष बस्नेतले बताउनुभयो ।  

गत आर्थिक वर्षमा विनियोजित ४५ लाख बजेटबाट १० किलोमिटर सडक विस्तार भएको थियो भने चालु आर्थिक वर्षको २५ लाख बजेट बाट करिव ६ किलोमिटर सडक विस्तारको काम सम्पन्न भएको छ ।  चित्रे सडक खण्ड उपभोक्ता समिति मार्फत ट्राक ओपनको काम भइरहेको सडकखण्ड लोखीम हुँदै खोटाङको ऐसेलुखर्क पुग्न सोताङ बासीलाई छिटो बाटोको रुपमा रहने उहाँको भनाई छ