फागुन २७, सोलुखुम्बु । सगरमाथा प्रदुषण नियन्त्रण समितिले खुम्बु आइसफल मार्ग निर्माण तथा मर्मत गर्न आइसफल डक्टरहरूको टोली सगरमाथा आधार शिविर पठाएको छ । यस वर्षको बसन्त ऋतु (२०२५) आरोहण सिजनको सुरुआतसँगै टोली नाम्चेबाट प्रस्थान गरी सगरमाथा आधार शिविरतर्फ गएको हो । आगामी तीन महिनासम्म उनीहरू खुम्बु आइसफलमा कार्यरत रहेर आरोहीहरूका लागि सुरक्षित मार्ग निर्माण गर्ने छन् ।
यस वर्षको आइसफल डक्टर टोलीमा आधारशिविर व्यवस्थापक छिरिङ तेन्जिङ शेर्पासहित आठ जना आइसफल डक्टर रहेका छन् । टोली नेताहरू अङ्ग सर्की शेर्पा (टोली–ए) र दावा जाङ्बु शेर्पा (टोली–बी) रहेका छन् भने अन्य सदस्यहरूमा दावा नुरु शेर्पा, निम तेन्जी शेर्पा, मिङ्मा ग्याल्जेन शेर्पा, दावा छिरी शेर्पा, लाक्पा सोना शेर्पा र तेन्डु शेर्पा रहेका छन् । साथै, टोलीलाई भान्से कर्मचारी वाङ्दी गेल्बु शेर्पा र ङवाङ थातेन शेर्पाले सहयोग गर्ने सगरमाथा प्रदूषण नियन्त्रण समितिले जनाएको छ ।
सन् १९९३ मा स्थानीय शेर्पा समुदायद्वारा स्थापित सगरमाथा प्रदूषण नियन्त्रण समिति खुम्बु क्षेत्रको वातावरण संरक्षणमा समर्पित एक सामुदायिक गैरसरकारी संस्था हो । यस संस्थाले खुम्बु पासाङ ल्हामु गाउँपालिकाभित्र पर्ने सगरमाथा राष्ट्रिय निकुञ्ज र यसको बफर जोनमा फोहोर व्यवस्थापनको महत्वपूर्ण भूमिका खेल्दै आएको छ । यसबाहेक समिति आरोहण अनुमति जाँच, अवैध आरोहण गतिविधि निगरानी तथा आधारशिविर क्षेत्रमा वातावरण संरक्षणसम्बन्धी कार्यान्वयनमा पनि संलग्न रहन्छ ।
सन् १९९७ देखि संस्कृति, पर्यटन तथा नागरिक उड्डयन मन्त्रालयअन्तर्गतको पर्यटन विभागले समितिलाई खुम्बु आइसफलको आरोहण मार्ग निर्माण तथा मर्मतको जिम्मेवारी प्रदान गर्दै आएको छ । एभरेस्ट आधारशिविरदेखि क्याम्पससम्मको यो खण्ड हिमपहिरो र गहिरा फाटका कारण अत्यन्तै जोखिमपूर्ण मानिन्छ । हरेक आरोहण सिजनमा समितिले विशेष रूपमा तालिम प्राप्त आठ जना आइसफल डक्टरहरूलाई खुम्बु आइसफलमा तैनाथ गर्छ ।
उनीहरूले भरपर्दो तरिकाले भर्याङ र डोरी जडान गरी आरोहीहरूका लागि सुरक्षित मार्ग निर्माण गर्ने कार्य गर्छन् । नियन्त्रण समितिले यस वर्ष पनि आइसफल डक्टरहरूलाई आवश्यक उपकरण तथा पोशाक उपलब्ध गराएकोमा ब्ल्याक याक कम्पनीलाई विशेष धन्यवाद व्यक्त गरेको छ ।
Discussion about this post