अखिल क्रान्तिकारी र क्याम्पस प्रशासन बिच तालमेल नमिल्दा सोताङमा स्ववियु चुनाव स्थगित

फागुन २८, सोलुखुम्बु । सोलुखुम्बुको सोताङ गाउँपालिका ४ स्थित सोताङ पब्लिक क्याम्पस सोताङमा स्ववियु चुनाव स्थगित गरिएको छ । लामो समयपछि आगामी चैत ५ गते हुन लागेको स्वतन्त्र विद्यार्थी युनियनको निर्वाचन नितान्त विद्यार्थीहरुको निम्ति भएको तर अखिल क्रान्तिकारी र क्याम्पस प्रशासन बिच फर्जि विद्यार्थी भर्ना गरिएको बिषयमा तालमेल नमिल्दा चुनाव स्थगित गरिएको हो ।

मंगलबार क्याम्पसमा फर्जी विद्यार्थी गरिएको भन्दै अखिल क्रान्तिकारी  जिल्ला कमिटी सोलुखुम्बुले तालाबन्दी गरेको थियो । हिजो देखिको दुई पक्षबिच वार्ता गरेर समस्याको समाधान गर्न खोजिएको भए पनि क्याम्पसले आज चुनाव स्थगित गरेको अखिल क्रान्तिकारी जिल्ला अध्यक्ष सोनाम शेर्पाले बताउनुभयो ।

क्याम्पस प्रशासनले अखिल क्रान्तिकारीले लगाएको आरोप सत्य नभएको र जुनसुकै बेला विद्यार्थीको विवरण देखाउन प्रशासन तयार रहेको सहायक क्याम्पस प्रमुख दधिराम धमलाले बताउनुभएको थियो । यता अखिल क्रान्तिकारीले भने भर्ना गरिएको फर्जी विद्यार्थी क्याम्पसले खारेज गर्नु पर्ने भन्दै वास्तविक विद्यार्थीलाई मताधिकारबाट बन्चित नगराउन र तोकिएको मितिमा नै स्ववियु निर्वाचन सम्पन्न गर्न विज्ञप्ती मार्फत आग्रह गर्दै आएको छ । विद्यार्थीहरुको पठनपाठनलाई असर पुग्ने भएकाले मंगलबार गरिएको तालाबन्दी खुल्ला गरिएको अखिल क्रान्तिकारी जिल्ला अध्यक्ष  शेर्पाले बताउनुभयो ।