कोशीका ३ जिल्लामा दुर्घटना, ३ जनाको मृत्यु

चैत्र १, सोलुखुम्बु । पूर्वी नेपालका ३ जिल्लामा भएका दुर्घटनाबाट ३ जनाको मृत्यु भएको छ । कोशी प्रदेशका उदयपुर, भोजपुर र सुनसरीमा बिहीबार भएका दुर्घटनामा तीन जनाको मृत्यु भएको हो । मदन भण्डारी लोकमार्गअन्तर्गत उदयपुरको त्रियुगा नगरपालिका–८ सरस्वती पुलमा राति ९ः३० बजेतिर ट्याक्टरमा मोटरसाइकल ठोक्किएर दुर्घटना हुँदा १ जनाको मृत्यु भएको छ। गाईघाटबाट चुहाडे जाँदै गरेको बा ६४ प ५१७ नम्बरको मोटरसाइकल सडकमा रोकेर राखिएको प्रदेश २–०१–००१ त २३०१ नम्बरको ट्याक्टरमा पछाडिबाट ठोक्किएको थियो । प्रहरीका अनुसार उक्त दुर्घटनामा मोटरसाइकल चालक त्रियुगा–७ भन्टाबारीका ३४ वर्षीय भुवन राईको मृत्यु भएको हो । ट्याक्टर र चालक उदयपुरको उदयपुरगढी गाउँपालिका–६ का २८ वर्षीय कूलबहादुर मगरलाई नियन्त्रणमा लिएको छ।

मोटरसाइकलको तीव्र गतिका कारण दुर्घटना भएको प्रारम्भिक अनुसन्धानबाट खुलेको प्रहरीको भनाइ छ । त्यस्तै, भोजपुरको आमचोक गाउँपालिका–६ स्थित घोडेटार–बालंखा कच्ची सडक खण्डमा ट्याक्टरबाट खसेर एक जनाको मृत्यु भएको छ। पूर्णेबाट बासिखोरातर्फ जाँदै गरेको प्रदेश १–०२–००३ त १३४३ नम्बरको ट्याक्टरबाट खसेर रामप्रसाद राई गाउँपालिका–७ का अन्दाजी २२ वर्षीय निशान राईको मृत्यु भएको हो । प्रहरीका अनुसार राई दिउँसो ४ः४५ बजेतिर ट्याक्टरबाट खसेका थिए। ट्याक्टरको पछाडिको चक्काले किच्दा उनको घटनास्थलमै मृत्यु भएको प्रहरीले जनाएको छ।

प्रहरीले ट्याक्टर चालक संखुवासभाको चैनपुर नगरपालिका–७ का २५ वर्षीय ओङ्दी शेर्पालाई नियन्त्रणमा लिएर अनुसन्धान सुरु गरेको छ। ट्याक्टर चालकको लापरबाहीले दुर्घटना भएको प्रारम्भिक अनुसन्धानबाट खुलेको छ । यस्तै, सुनसरीको हरिनगर गाउँपालिका–४ मा ट्याक्टरले ठक्कर दिँदा पैदलयात्रीको मृत्यु भएको छ। इनरुवाबाट हरिनगरतर्फ जाँदै गरेको प्रदेश २–०१–००१ त २४७१ नम्बरको ट्याक्टरले ठक्कर दिंदा दिउँसो १ बजेतिर पैदलयात्री हरिनगर–४ का ३५ वर्षीय उमेश महतोको मृत्यु भएको हो । प्रहरीले ट्याक्टर र चालक सप्तरीको कन्चनरूप नगरपालिका–४ का ३४ वर्षीय रूपेश सरदारलाई नियन्त्रणमा लिएर अनुसन्धान सुरु गरेको छ ।