राईकाे दुना–टपरी उद्योग, लोकल सालकाे पातले लिदैँ प्लाष्टिकको बजार 

चैत्र २, साेलुखुम्बु । खोटाङको बाम्राङका ज्ञान बहादुर राईले दुना टपरी उद्योग सञ्चालन गरेर प्लाष्टिकका आयातित सामाग्रीको बजारलाई चुनौति दिनुभएको छ । दिक्तेल रूपाकोट मझुवागढी नगरपालिका–३ बाम्राङका राईले लोकल सालको पातको दुना टपरी उद्योग सञ्चालनमा ल्याएपछि आयातीत बजारे प्लाष्टिकका सामाग्रीको बजार अहिले दिक्तेलमा चुनौतिमा पुगेको हो । राईले मेसिनमार्फत सालको पात प्रयोग गरेर व्यावसायिक रूपमा दुना–टपरी उत्पादन गर्न सुरू गरेको जनाइएको छ ।

प्लाष्टिकजन्य वस्तुले सहरबजार मात्र नभएर गाउँघरसमेत फोहर बनाउनुका साथै वातावरणमा प्रतिकूल असर गरिरहेकाले त्यसलाई विस्थापित गर्न सालको पातबाट दुना–टपरी बनाएर उपयोगमा ल्याउने उद्देश्यले उद्योग स्थापना गरेको सञ्चालक राईले बताए । मेसिनमार्फत उत्पादन गरिएको दुनाको मूल्य प्रतिगोटा रू पाँच र टपरीको प्रतिगोटा रू आठका दरले निर्धारण गरिएको जनाइएको छ ।

निम्न आर्थिक अवस्थाका महिलालाई रोजगारीको अवसरसमेत दिलाउने उद्देश्यले दुना–टपरी उद्योग स्थापना गरिएको सञ्चालक राईले जानकारी दिए । गाउँमा हुने हरेक साँस्कृतिक कार्यहरु, विवाह व्रतबन्ध, भोज, भतेर तथा पूजापाठमा दुना–टपरी प्रयोग एवं त्यसमा राखेर खाने परम्परा रहेपनि पछिल्लो समय आयातित प्लाष्टिकका सामाग्रीले उक्त परम्परा लोप हुने अवस्थामा छ । तर बाम्राङका राईले लोप हुनै लागेको उक्त परम्परालाई जोगाउन र स्थानीय बस्तुको सदुपयोग सँगै रोजगारी श्रीजना गर्न पनि मेसिनमार्फत व्यावसायिकरूपमा दुना–टपरी बनाउन सुरू गरेका छन् ।

बाम्राङमा उत्पादित दुना–टपरी गाउँमा हुने पूजापाठ, विवाह तथा व्रतबन्धका साथै जिल्लाको प्रमुख व्यापारिक केन्द्र दिक्तेल बजारमा खपत हुने गरेको छ । बाम्राङमा दुना–टपरी उद्योग सञ्चालन भएपछि उपभोक्तालाई समेत सहज भएको छ । उता, जिल्लाकै हलेसी तुवाचुङ नगरपालिका–३ च्यास्मिटारमा दुना–टपरी उद्योग सञ्चालन गरेको छ । त्रिधार्मिकस्थल हलेसी दर्शन गर्न आउने दर्शनार्थीलाई लक्षित गर्दै नगरपालिकाले दुना–टपरी उद्योग सञ्चालन गरेको हो ।