डढेलो लगाउनेलाई कारवाहीको दायरामा ल्याउँनुपर्नेमा प्रशासनको जोड 

चैत्र, ६, सोलुखुम्बु । सोलुखुम्बुमा वन डढेलो नियन्त्रण सप्ताह सुरु भएको छ । डिभिजन वन कार्यालय सोलुखुम्बुको आयोजनामा बुधबार एक प्रभातफेरी गर्दै औपचारिक रुपमा वन डढेलो नियन्त्रण सम्बन्धी सप्ताह सुरु भएको हो ।  जिल्ला प्रशासन कार्यालय सोलुखुम्बुका प्रमुख जिल्ला अधिकारी अनोज कुमार घिमिरे सहित जिल्ला प्रहरी कार्यालय सोलुखुम्बुका प्रमुख द्वारीका प्रसाद घिमिरे, शसस्त्र प्रहरी वल सोलुखुम्बुका प्रमुख गोविन्द पोखरेल सहितको प्रभातफेरीले जिल्ला सदरमुकाम सल्लेरी स्थित जिल्ला समन्वय समितिबाट नयाँ बजार सम्म विभिन्न सन्देशमुलक प्लेकार्ड सहितको प्रभातफेरी गरेको थियो ।

वन डढेलो लगाउनु अपराध हो, स्वच्छ वातावरण समृद्ध जीवन, वन संरक्षण पानीको संरक्षण जस्ता नारा लेखिएका प्लेकार्ड बोकेर प्रभातफेरी गरिएको थियो । प्रभातफेरी दोर्पु नयाँबजारमा पुगेर कोण सभामा परिणत भएपछि त्यहाँ जिल्ला समन्वय समितिका प्रमुख तथा जिल्ला वन संरक्षण समन्वय समितिका प्रमुख कृष्ण प्रसाद निरौलाले वन संरक्षण गनुृ सबैको दायित्व भएकाले डढेलो लगाउने व्यक्तिको पहिचान गरि कारवाही गर्नुपर्ने बताउनुभएको थियो ।  उहाँले वनमा आगो लगाउदा त्यसको असर मानव जीवनमा पर्ने उल्लेख गर्दै वन डढेलो लगाउनु अघि हजार पटक सोच्नुपर्ने उल्लेख गर्नुभयो ।  

यस्तै कार्यक्रममा बोल्दै डिभिजन वन कार्यालय सोलुखुम्बुका प्रमुख रामजी शाहले वन डढेलो नियन्त्रण गर्न एक सरकारी कार्यालयमात्रै पर्याप्त नभएकाले सबैले आआफ्नो ठाउँबाट अघि बढ्नुपर्ने उल्लेख गर्नुभयो । कार्यक्रममा रेडियो एभरेष्टसँग कुरा गर्दै वन डढेलोको मुख्य कारण मानवीय संलग्नता भएकाले पहिला मानिसले आफूलाई सुधार्नुपर्ने आवश्यकता भएको उल्लेख गर्नुभयो ।

उहाँले घाँस दाउराको लोभमा जङ्गली जनावरको बासस्थान र मानवीय जनधनको क्षती हुने भएकाले डढेलो नियन्त्रणमा समुदायले भूमिका खेलमात्रै सम्भव हुने पनि उल्लेख गर्नुभयो ।  उहाँले डढेलो लगाउने व्यक्तलाई समुदायले संरक्षण गर्ने भएकाले त्यसरी संरक्षण गर्दा उक्त व्यक्तिको मनोबल थप मजबुत हुने उल्लेख गर्नुभयो । उहाँले यस्ता व्यक्तिलाई कारवाहीको दायरामा ल्याउनुपर्ने पनि उल्लेख गर्नुभयो ।   दायरामा ल्याएर सुख्खा मौसममा वन डढेलोको जोखिम अत्याधिक हुने भएकाले आगोजन्य बस्तु तथा तत्वहरुबाट जंगललाई टाढा राख्न सके निकै कम हुने उहाँको भनाई थियो ।