हिमाल दर्शनको सोह्र प्रतिवद्धता, विद्यालयमा फोन देखी जंक फुड सम्म निषेध

जेठ ११, सोलुखुम्बु । सोलुखुम्बुको नेचासल्यान स्थित हिमाल दर्शन माध्यमिक विद्यालयले  मोबाइल निषेध गर्ने भएको छ । आज बसेको विद्यालयको बैठकले स्वर्ण वर्ष १६ प्रतिबद्धता जाहेर गर्दै अन्य विभिन्न प्रतिवद्धता सहित मोबाइल फोन निषेध गर्ने प्रतिवद्धता व्यक्त गरिएको हो ।

गुणस्तरीय शिक्षा हाम्रो प्रतिबद्धता मुल मन्त्र लिएको विद्यालयले शिक्षा ऐन नियमावली र विद्यालयले जारी गरेका शिक्षक विद्यार्थी विव्यस सिअसंघ आचार संहिता पुर्ण रुपमा पालना गर्ने, स्वर्ण जयन्ती सभ्य र भव्य बनाउने, विद्यालयमा भौतिक निर्माण कार्य सम्पन्न गर्न विव्यस र सिअसंघ पदाधिकारी सहभागि नबनी मापदण्ड बमाेजिम कार्य भए नभएको नियमन र अनुगमन गर्ने प्रतिबद्धता व्यक्त गरेको छ ।

यस्तै स्थानीय सरकारसँग विद्यालय कार्यक्रम अन्तर्गत गाउँपालिका अध्यक्ष र उपाध्यक्ष सँग विद्यार्थी शैक्षिक अन्तरक्रिया कार्यक्रम सञ्चालन गरिनुका साथै शैक्षिक वातावरणलाई सुदृढ बनाउन विद्यालयसँग अभिभावक कार्यक्रम प्राथमिकताका साथ कार्यान्वयन गरिने प्रतिवद्धता व्यक्त गरिएको छ ।

यसका साथै शिक्षक पोशाक र विद्यार्थी पोशाक अनिवार्य गर्ने, आधारभुत तहको विद्यार्थी मूल्याङ्कनलाई प्रभावकारी बनाउनुका साथै कक्षा १० को एसइई परिक्षा र कक्षा १२ को वोर्ड परिक्षा सञ्चालन हुनु पुर्व ल्याकत परिक्षा सम्पन्न गर्ने, सम्बन्धीत निकायबाट आएका निष्कर्ष तथा निर्देशनहरु कर्तव्यपरायण तवरले पालना गर्ने, विद्यालयमा इ स्कुल एप्सको प्रयोग गर्ने, कक्षामा गृहकार्यलाई अनिवार्य गरि हप्ताको एक दिनलाई प्रयोगात्मक दिन घोषणा गरि प्रयोगात्मक कार्यमा केन्द्रित गर्ने, विद्यालय हातालाई घेराबारा गर्न दातृ निकाय सँग समन्वय गरि यथासिघ्र काम सम्पन्न गर्नुका साथै हिमाल दर्शन पुर्व विद्यार्थी समाज तथा अन्य सरकारी गैर सरकारी संस्थासँग सहकार्य गरि शैक्षिक उन्नयनका काममा जोड दिइने, विद्यार्थी सहायता कोषलाई व्यवस्थित र प्रभावकारी बनाउने र दाताहरूलाई सम्मान गर्ने, विद्यालयमा स्वच्छ पिउने पानी तथा बालमैत्री शौचालयको व्यवस्थापन गर्ने, कक्षाकोठा शैक्षिक समाग्री युक्त कक्षाकोठा निर्माण गर्ने, जंक फुड मुक्त विद्यालय बनाउने लगायतका प्रतिबद्धता सार्वजनिक गरिएको छ ।

विद्यालय व्यवस्थापन समितिका अध्यक्ष ओम प्रसाद बास्तोला, शिक्षक अभिभावक संघ अध्यक्ष नानु माया बास्तोलाका साथै प्रधानाध्यापक अशोक कुमार शर्मा सहितको बैठकले यस्ता प्रतिबद्धता व्यक्त गर्नुभएको हो ।