प्रदेश प्रहरी प्रमुख अधिकारीले गरे खार्पा प्रहरी चौकीको भवन उद्घाटन

चैत्र ११, सोलुखुम्बु । खोटाङको रावा बेसी गाउँपालिका–२ खार्पास्थित खार्पा प्रहरी चौकीको नवनिर्मित सुविधा सम्पन्न आरसिसी भवनको उद्घाटन गरिएको छ । पूर्व खार्पा गाउँ विकास समितिको पुरानो भवनमा बस्दै आएको खार्पा प्रहरी चौकीको नवनिर्मित भवन कोशी प्रदेश प्रहरी प्रमुख राजन अधिकारीले आइतबार उद्घाटन गर्नुभएको हो ।

भ्याटसहित २ करोड ९५ लाख ३२ हजार लागतमा निर्माण भएको सुविधा सम्पन्न भवनको प्रहरी नायव महानिरीक्षक अधिकारीले रिवन काटेर औपचारिक रुपमा उद्घाटन गर्नुभएको छ । २०७६ सालमा स्थापना भएको खार्पा प्रहरी चौकीले यस अघि गाविसको पुरानो भवनबाट सेवा प्रदान गर्दै आएको थियो ।

हाल नयाँ भवन निर्माण भएर प्रयोगमा आएसँगै सेवा प्रवाहमा सहज हुने जिल्ला प्रहरी कार्यालय खोटाङका प्रमुख (डिएसपी) प्रतिक बिष्टले बताउनुभयो ।

सानो ठुलो गरी ११ वटा कोठा रहेको साढे दुई तले भवनमा कार्यालय प्रमुख कक्ष, सञ्चार कक्षहरुसहित एटेज शौचालय सुविधिसहितको महिला तथा पुरुष हिरासत कक्ष, एटेज शौचालयसहितको महिला र पुरुष ब्यारेक, कार्यालय प्रमुख आवाश, मनोरञ्जन हल लगायतका कोठाहरु निर्माण गरिएको छ ।