रावाबेसीँका ३३ जनालाई नयाँ अपाङ्गता परिचयपत्र

जेठ ११, सोलुखुम्बु । खोटाङको रावाबेसी गाउँपालिकामा जारी अपाङ्गता पहिचान तथा परिचयपत्र वितरण शिविर मार्फत हाल सम्म ३३ जना लाई नयाँ अपाङगता परिचयपत्र वितरण गरिएको छ । गत ८ गतेबाट सुरु भएको शिविरमा अहिले सम्म ४ वटा वडाका १ सय ७३ जनाको स्वास्थ्य परिक्षण गरि ३३ जनालाई नयाँ अपाङ्गता परिचयपत्र वितरण गरिएको हो ।

गाउँपालिकाका महिला तथा बालवालिका शाखाका प्रमुख सुशिला घिमिरेका अनुसार वडा नम्बर ६ हौँचुरका ९ जनालाई नयाँ अपाङगता परिचयपत्र वितरण गरिएको छ । यस्तै वडा नम्बर ५ दुबेकोलका ९ जनालाई, वडा नम्बर ४ डुम्रेका ११ जनालाई, वडा नम्बर ३ लामि डाँडाका ४ जनालाई हाल सम्म नयाँ परिचयपत्र वितरण गरिएको उहाँको भनाई छ ।

रावाबेसी गाउँपालिका, कोशी प्रदेश सरकार सामाजिक विकास मन्त्रालय र करुणा फाउण्डेसनको त्रिपक्षीय लागत साझेदारीमा सञ्चालित अपाङ्गता पुनस्र्थापना तथा रोकथाम कार्यक्रममा राष्ट्रिय अपाङ्ग महासंघको प्राविधिक सहयोग रहेको छ । शिविर मार्फत हाल सम्म गाउँपालिकाका पुराना अपाङ्गता परिचयपत्र बाहक ७२ जनाको नविकरण भएको छ ।

शिविर मार्फत सेवा लिएका सेवाग्राही हरुले आफ्नो पहिचानका लागी सरकारी मापदण्ड अनुसार परिचयपत्र प्राप्त गरेकाले सहज हुने गाउँपालिका अध्यक्ष फट्टिक कुमार श्रेष्ठले बताउनुभयो । शिविर आगामी जेठ १३ गते सम्म चल्ने छ ।