नेचासल्यानका २ विद्यालयमा दिइयो स्थानीयस्तरमा उत्पादन भएका स्यानिटरी प्याड

जेठ ११, सोलुखुम्बु । सोलुखुम्बुको नेचासल्यान गाउँपालिका स्थित हिमाल दर्हन माविलाई स्थानीय स्तरमा बनेको स्यानिटरी प्याड उपलब्ध गराइएको छ । नेचासल्यान उद्योग बाणिज्य संघका पदाधिकारीले विद्यालयलाई ५६ पिस स्यानिटरी प्याड उपलब्ध गराएका हुन ।

शुक्रबार विद्यालयमा पुगेर संघका अध्यक्ष हेमराज भट्टराई, उपाध्यक्ष नवराज जमरकट्टेल, विक्रम राई महासचिव प्रकाश टकले र सदस्य यानु राईको टोलीले विद्यालयमा किशोरीहरुलाई लागी आवश्यक स्यानिटरी प्याड उपलब्ध गराएको विद्यालयले जनाएको छ । यस्तै उद्योग बाणिज्य संघ नेचासल्यान केदार माध्यमिक विद्यालयलाई पनि ५६ वटा स्यानिटरी प्याड उपलब्ध गराएको अध्यक्ष हेमराज भट्टराईले बताउनुभयो ।

गाउँपालिकामा आयातित स्यानिटरी प्याड विस्थापित गराउने उद्देश्य सहित चैत्र १२ गतेदेखि २७ गते सम्म स्यानिटरी प्याड बनाउने तालिम दिइएको थियो । सिप विकास तालिम केन्द्र ओखलढुङ्गा, उद्योग बाणिज्य संघ, नेचासल्यान र नेचासल्यान गाउँपालिकाको सहकार्यमा सञ्चालित तालिमबाट स्थानीय ३० जना महिलालाई यसको उत्पादन सम्बन्धी तालिम दिइएको थियो । सोही तालिम लिएका महिलाहरुले अहिले पनि प्याड उत्पादन गरिरहेको र उत्पादित केही प्याड हरु विदालयलाई निशुल्क उपलब्ध गराइएको अध्यक्ष भट्टराईको भनाई छ ।