कृषि ज्ञान केन्द्र सोलुले गर्यो, आगामी वर्षका लागि योजना तर्जुमा गोष्ठी

चैत्र १४, सोलुखुम्बु । कृषि ज्ञान केन्द्र सोलुखुम्बको आगामी वर्ष २०८२/०८३ का लागि योजना तर्जुमा गोष्ठी सम्पन्न भएको छ । बिहिबार कृषि ज्ञान केन्द्र सोलुखुम्बुका प्रमुख दुर्गा बहादुर तिरुवाको अध्यक्षता तथा जिल्ला समन्यव समितिका प्रमुख कृष्ण प्रसाद निरौलाको प्रमुख आतिथ्यतामा एक दिने योजना तर्जुमा गोष्ठी सम्पन्न भएको हो । ज्ञान केन्द्रले जिल्लामा गरिरहेका काम, कृषिमा भित्रिएका प्रविधि, आगामी योजना तथा समस्या लगायतको जानकारी गराउने उद्देश्यले कार्यक्रमको आयोजना गरिएको ज्ञान केन्द्रले बताएको छ ।

कृषि ज्ञान केन्द्र सोलुखुम्बुका प्रमुख दुर्गा बहादुर तिरुवाले गोष्ठीमा ज्ञान केन्द्रले गत वर्ष भए गरेका कार्यहरू, चालु वर्षमा सञ्चालनमा रहेका कार्य, कृषि प्रविधि र आगामी योजनाको बारेमा जानकारी गराउनुभएको थियो । आगामी आर्थिक बर्षको योजनामा किसानहरूलाई कृषि सम्बन्धी तालिम दिने, नयाँ प्रविधि भित्र्याएर जिल्लाको कृषि क्षेत्रलाई थप विस्तार गर्ने लक्ष्य रहेकाले सबैले सहयोग गर्नुपर्ने प्रमुख तिरुवाले बताउनुभयो ।

उहाँले दक्ष जनशक्तिको व्यवस्था, कृषिमा ठुलो मात्रामा लगानी र लगनशील किसनाहरु भएमा कृषि क्षेत्रको विकास हुने उल्लेख गर्नुभएको छ । यस्तै जिल्ला समन्वय समितिका प्रमुख कृष्ण प्रसाद निरौलाले चरिखाने हैन गरिखाने किसानलाई प्रोत्साहन हुने खालका महत्त्वपूर्ण कार्यक्रम समावेश गर्न आग्रह गर्नुभएको छ । यस्तै जिल्लामा रहेका रैथानेवालीको संरक्षण र उत्पादनमा ध्यान दिनुपर्ने महाकुलुङ गाउँपालिकाकी उपाध्यक्ष विपना कुलुङले बताउनुभयो ।

उहाँले योजना तर्जुमाको पहिलो अभ्यासका लागि धन्यवाद व्यक्त गर्दै किसानको आवश्यकताका आधारमा योजना बनाउन आग्रह गर्नुभयो । गोष्ठीमा सहभागी स्थानीय तहका कृषि शाखाका प्रमुखहरुले स्थानीयस्तरमा कृषकहरुले नियमित माटो परीक्षणको कार्यक्रम, बीज वृद्धि, मौरिपालन कार्यक्रम व्यवस्था गर्नुपर्ने माग गरेका छन् ।

उनीहरुले दक्ष जनशक्ति र समय अनुसार उनीहरुको क्षमता विकासमा ध्यान दिनुपर्ने समेत बताएका छन् । यसका साथै कृषि क्षेत्रको सम्भाव्यता अध्ययन, प्रविधिको प्रर्दशन र बजार व्यवस्थापनमा सहयोग पुग्ने कार्यक्रम तर्जुमा गर्न ज्ञान केन्द्रलाई आग्रह समेत गरेका छन् ।