मन्त्री राईबाट एकैदिन २ वडा भवन शिलान्यास 

खोटाङ, चैत्र १४ गते । खोटाङको केपिलासगढी गाउँपालिकामा एकैदिन २ वटा वडा कार्यालय भवन शिलान्यास गरिएको छ ।  कोशी प्रदेशका भौतिक पूर्वाधार विकास तथा स्वास्थ्य मन्त्री भुपेन्द्र राईले केपिलासगढी गाउँपालिकाको २ वटा वडाको प्रशासनिक भवन उद्‌घाटन गर्नुभएको हो । उहाँले गाउँपालिकाको वडा नम्बर ४ बाक्सिला बजार र वडा नम्बर २ खार्तम्छाकाे प्रशासनिक भवन शिलान्यास गर्नुभएको छ ।  

प्रशासनिक भवन उद्‌घाटन गर्दै मन्त्री राइले अव खोटाङ विकासमा पछि पर्न नहुने भन्दै उहाँले आफूले प्रतिबद्धता गरेर गएको सम्पूर्ण कामहरू सम्पन्न गर्नेमा विश्वस्त हुन आग्रह गर्नुभयो ।  मन्त्री राईले जिल्लामा धेरै नेताहरूले जनताको भोट खेर फलेको दावी गर्दै सँधै एउटै मुद्दाले चुनाव जित्छु भन्ने भ्रम नपाल्न पनि अनुरोध गर्नुभयो ।  कार्यक्रममा गाउँपालिका अध्यक्ष समिर राईले केपिलासगढी गाउँपालिकाका सबै वडाको प्रशासनिक भवन निर्माण गर्न आफू निर्वाचित भए देखीनै प्रयास गरेको भएपनि अहिले आएर प्रयास सफल भइरहेको उल्लेख गर्नुभयो । उहाँले भौतिक पूर्वाधार विकास मन्त्रालयबाट गाउँपालिकामा केही महत्वपूर्ण विकासे कामहरू भइरहेको भन्दै खुसी व्यक्त गर्नुभयो ।  

उहाँले केपिलासगढी गाउँपालिका प्रवेश गर्ने एउटा बाटो कालोपत्रकाे सुरुवात मन्त्री राईको कार्यकालमा हुनेमा विश्वास व्यक्त गर्नुभयो । उहाँले गाउँपालिकाले गर्न सक्ने विकासका काम गाउँपालिकाले गर्नेमा नागरिकलाई विश्वस्त रहन आग्रह गर्दै गाउँपालिकाको पहुँचभन्दा बाहिर रहेका विकास निर्माणका काममा प्रदेश सरकारसँग समन्वय गर्ने बताउनुभयो ।  कार्यक्रममा पूर्व मन्त्री राजन राई, गाउँपालिकाका उपाध्यक्ष गुरुराज राई, गाउँपालिकाका प्रमुख प्रशासकीय अधिकृत सौधन राई लगायत नेपाली काङ्ग्रेसका नेता कार्यकर्ता एवं स्थानीय सरोकारवाला जनताको उपस्थिति रहेको थियो ।

 शिलान्यास कार्यक्रम सम्बन्धित वडाका अध्यक्षहरूका सभाध्यक्षतामा भएको थियो ।  दुबै वडा कार्यालयका भवन चतुरूप माइला जेभी निर्माण कम्पनीले निर्माणकाे जिम्मा लिएकाे छ । उक्त निर्माण कम्पनीले वडा नम्बर २ काे प्रशासनिक भवन भ्याट सहित ४७ लाख २७ हजार ५ सय ६९ रूपैयामा निर्माण सम्पन्न गर्ने छ भने वडा नम्बर ४ बाक्सिलाकाे भवन ४८ लाख ८१ हजार २० रूपैयाँकाे लागतमा निर्माण सम्पन्न गर्नेगरी सम्झाैता गरेकाे छ ।