उदयपुरका श्रेष्ठ लागुऔषधसहित पक्राउ

चैत्र १९, सोलुखुम्बु । उदयपुरको कटारी नगरपालिका–४ सौय चुनढुङगा सडकखण्डबाट लागुऔषध गाँजा करिब ४० किलोग्राम सहित सोही नगरपालिका–५ बस्ने २९ वर्षीय प्रेम बहादुर श्रेष्ठलाई मंगलबार राति प्रहरीले पक्राउ गरेको छ। जिल्ला प्रहरी कार्यालय उदयपुरबाट खटिएको प्रहरीले आहालेबाट कटारीतर्फ जाँदै गरेको प्रदेश २–०१–००१ ह ११२६ नम्बरको अटोलाई जाँच गर्ने क्रममा २ वटा पोकामा रहेको उक्त गाँजा फेला पारी चालक प्रेम बहादुरलाई पक्राउ गरेको हो ।

यसैबिच झापाको मेचीनगर नगरपालिका–५ नकलबन्दाबाट लागुऔषध खैरो हेरोइन जस्तो देखिने पदार्थ ३ ग्राम सहित २ जनालाई सोमबार दिउँसो प्रहरीले पक्राउ गरेको छ। पक्राउ पर्नेहरूमा भारत दार्जिलिङ नक्सालवाडी थाना दयाराम बस्ती घर भएका २० वर्षीय बिकाश बैठा र झापा दमक नगरपालिका–१ दुसंचार टोल बस्ने ३६ वर्षीय नगेन्द्र बस्नेत रहेका छन्। इलाका प्रहरी कार्यालय नकलबन्दाबाट खटिएको प्रहरीले भारतबाट नेपालतर्फ पैदल आउँदै गरेका उनीहरूलाई उक्त पदार्थ सहित पक्राउ गरेको हो ।