कुर्लनी श्रीचौर सामुदायिक वनमा लागेको ढडेलो दुई दिन पछि नियन्त्रणमा

चैत्र २०, सोलुखुम्बु । सोलुखुम्बुको नेचासल्यान गाउँपालिका वडा नम्बर २ केराबारी भित्तेडाडा स्थित कुर्लनी श्रीचौर सामुदायिक वनमा लागेको डढेलो नियन्त्रणमा आएको छ । चैत्र १८ गतेबाट सुरु भएको आगो आज बुधबार बिहान ८ : ५५ बजेको समयका पूर्ण रुपमा नियन्त्रणमा आएको जिल्ला प्रहरी कार्यालय सोलुखुम्बुले जनाएको छ ।

अस्थाई प्रहरी चौकी सल्यानमा जानकारी प्राप्त हुनासाथ इलाका प्रहरी कार्यालय नेचा र अस्थाई प्रहरी चौकीबाट खटिएको प्रहरीको टोली र स्थानीयबासीहरुले डढेलो नियन्त्रणमा लिएको डिएसपी द्धारिका प्रसाद घिमिरेले जानकारी दिनुभयो । उक्त डढेलोबाट करिब १ सय ५० रोपनी वनमा रहेको बोटबिरुवा तथा झारपात जलेर नष्ट भएको छ ।