सगरमाथा आधार शिविरमा लेक लागेर श्रमिकको मृत्यु

चैत्र २०, सोलुखुम्बु । सगरमाथा आधार शिविरमा एक नेपाली श्रमिकको मृत्यु भएको छ । दोलखाको गौरीशङ्कर गाउँपालिका–९ का ५५ वर्षीय लानिमा शेर्पाको मृत्यु भएको हो । शेर्पाले सोलुखुम्बुको खुम्बु पासाङल्हामु गाउँपालिका–४ स्थित सगरमाथा बेस क्याम्पमा काम गर्दै आएका जिल्ला प्रहरी कार्यालय सोलुखुम्बुले जनाएको छ ।

चैत १७ गते साँझ ७ः ३० बजे लेक लागेर बिरामी परेका शेर्पालाई घोडामार्फत खुम्जुङ स्वास्थ्य चौकी लैजाने क्रममा चैत १८ गते थुक्लामा ज्यान गएको जिल्ला प्रहरी कार्यालय सोलुखुम्बुका डिएसपी द्धारिका प्रसाद घिमिरेले जानकारी दिनुभयो ।

शवको कानुनी प्रक्रिया पूरा गरी मृतकको शव परीक्षणका लागि अल्टिच्युट हेलिकप्टरमार्फत टिचिङ अस्पताल काठमाडौँ लगिएको थियो । शव परीक्षण पश्चात चैत १९ गते मृतकको शव उनका भतिजा पेमाछिरी शेर्पाले बुझिसक्नु भएको प्रहरीले जनाएको छ ।