उदयपुरमा लागु औषध ट्याब्लेटसहित सात जना पक्राउ

चैत्र २०, सोलुखुम्बु । उदयपुरको कटारी नगरपालिका वडा नम्बर ४ कान्छी बजारबाट लागु औषधसहित सात जनालाई प्रहरीले पक्राउ गरेको छ । इलाका प्रहरी कार्यालय कटारीका प्रहरी निरीक्षक भिमलाल ओलीको कमाण्डमा खटिएको प्रहरी टोलीले सोहि ठाउँ निवासी सात व्यक्तिलाई नियन्त्रमा लिएको जिल्ला प्रहरी कार्यालय उदयपुरका प्रहरी निरीक्षक सन्तोष कार्कीले बताउनुभयो ।

पक्राउ पर्नेमा जिल्ला उदयपुर कटारी नगरपालिका वडा नम्बर ७ का २९ वर्षीय हरिबहादुर तामाङ, वडा नम्बर ८ का १९ वर्षीय भक्तबहादुर तामाङ, २५ वर्षका सोमकृष राई, वडा नम्बर ४ का २३ वर्षीय अनमोल मगर, २० वर्षीया आरती राउत, २३ वर्षीय शरद कुमार सुनुवार र १९ वर्षीय बिक्रम साशंकार रहेको प्रहरी निरीक्षक कार्कीले बताउनुभयो ।

निजहरुका साथबाट टुपेन चारहजार ४३१ थान, स्पासपेन पाँचहजार ९१२ थान र टपेन्टा १२० थान गरी १० हजार ४६३ थान प्रतिबन्धित ट्याब्लेट, गाँजा १०० ग्राम, दुई लाख ४७ हजार ७२० रुपियाँ नगद, प्र.१–०५–००१ प ७६०२ नम्बरको २२० सिसिको कालो रङको पल्सर मोटरसाइकल र प्र.१–०५–००१ प ७४९७ नम्बरको २२० सिसिको कालोफ्स्रो रङको समेत गरी दुईवटा मोटरसाइकल तथा छ थान मोवाइल फोनसमेत बरामद गरिएको र पक्राउ परेका सबैजनालाई इलाका प्रहरीकार्यालय कटारीमा राखी थप अनुसन्धान भइरहेको प्रहरी निरीक्षक कार्कीले बताउनुभयो ।