रामेछापमा सहकारीलाई व्यवस्थित गर्नुपर्ने सरोकारवालाको धारणा

चैत्र २०, सोलुखुम्बु । रामेछापमा ६८औँ सहकारी दिवसको अवसरमा विविध कार्यक्रमहरु गरिएको छ । मन्थली नगरपालिकाको आर्थिक सहयोग तथा विभिन्न सहकारी संघहरुको आयोजनामा कार्यक्रम गरिएको हो । जसअन्तर्गत बिहान मन्थली बजारमा र्याली आयोजना गरिएको थियो । र्यालीपछि आयोजित कार्यक्रम मन्थली नगरपालिका उपप्रमुख ईश्वरी बस्नेतले सहकारी संस्थाहरू मापदण्ड अनुसार चल्नुपर्ने बताउनुभयो ।

उहाँले मापदण्डमा चलेका सहकारी र सहकारीबाट लिएको ऋण ठिक ठाउँमा परिचालन गर्नेहरू कुनै समस्यामा नपरेका बताउँदै बस्नेतले सहकारी मापदण्ड अनुसार चल्नुपर्ने र ऋण लिने पनि सही काममा त्यसको प्रयोग गर्नुपर्नेमा जोड दिनुभयो । यस्तै जिल्ला सहकारी संघका अध्यक्ष हिमाल ढुङ्गेलले नेपालमा सबैभन्दा ठूलो नागरिक सञ्जाल भएको सहकारी क्षेत्र अहिले गम्भीर संकटमा परेको बताउनुभयो ।

सहकारीहरू बिस्तारै अप्ठेरोमा पर्दै गएकाले यसमा लाग्नेले सचेतता पूर्वक काम गर्नुपर्ने उहाँको धारणा छ । रामेछाप बचत तथा ऋण सहकारी संस्थाका लिमिटेडका अध्यक्ष जगन्नाथ दाहालले सहकारीको नाममा पैसा जम्मा गर्ने र जथाभाबी ऋण लगानी गर्नेहरूका कारण सहकारी क्षेत्र संकटमा परेको उल्लेख गर्नुभयो । कार्यक्रममा विभिन्न सहकारी संघका अध्यक्षहरूले पनि धारणा राखेका थिए ।