सोलुमा आगलागीका घटना बढ्दै, फेरि थुलुङ दुधकोशीमा एक घर जल्यो

चैत्र २०, सोलुखुम्बु । सोलुखुम्बुको थुलुङ दुधकोशी गाउँपालिका ९ साउरेमा आगलागी भएको छ । आज (बुधबार) बिहान ११ बजेको समयमा आगलागी भएको जिल्ला प्रहरी कार्यालय सोलुखुम्बुले जनाएको छ । जिल्ला प्रहरी कार्यालय सोलुखुम्बुका अनुसार साउरेका श्रीमान तामाङको चित्राको बेरा र चित्राकै छानो भएको भुँई तले घरमा अचानक आगलागी भएको जनाइएको छ ।

आगलागी भएको जानकारी प्राप्त हुनसाथ प्रहरी चौकी सुकेपोखरीबाट खटिगएको प्रहरीको टोली र स्थानीयबासीहरुको सक्रियतामा दिउँसो १२ : ४० बजेको समयमा आगो पूर्ण रुपमा नियन्त्रणमा लिइएको जिल्ला प्रहरी कार्यालय सोलुखुम्बु प्रहरी नायव उपरीक्षक द्धारिका प्रसाद घिमिरेले जानकारी दिनुभयो । उहाँका अनुसार आगलागीबाट घर भित्र रहेको लत्ताकपडा, भाडावर्तन, अन्नपात र १५ हजार रुपैयाँ नगद, ९ वटा कुखुरा जलेर नष्ट भएको जनाइएको छ ।